ბიუჯეტები საკრებულოებს დაუბრუნდა და მორიგი ეტაპი, საჯარო განხილვები იწყება

მერიებიდან საკრებულოებში ბიუჯეტის პროექტის დაბრუნების ვადა 10 დეკემბერს ამოიწურა. ბორჯომის მერი ლევან ლიპარტია ამბობს, რომ შესწორებულ ვარიანტს საკრებულოს მალე დაუბრუნებს: „10 დეკემბერი კვირა იყო, ამიტომ, შევეცდებით მალე გადავაგზავნოთ“.

ახალციხის საკრებულოს თავმჯდომარის გელა ნოზაძის განმარტებით, აღმასრულებელმა ორგანომ მათი შენიშვნები გაითვალისწინა. საკრებულომ მერიისგან ბიუჯეტი 8 დეკემბერს მიიღო. ამ დროის მონაცემებით, ახალციხის მომავალი წლის ბიუჯეტის პროექტი 13 მილიონი ლარით განისაზღვრება.

7 დეკემბერს მიიღო საფინანსო დოკუმენტი მერიისგან ადიგენის საკრებულომ. აქაც ირწმუნებიან, რომ შენიშვნები გათვალისწინებულია. ადიგენის ბიუჯეტი 4 მილიონ 700 ლარია.

„ჩვენი შენიშვნა, რომ თანხები დამატებოდა სოციალურ პაკეტს და კეთილმოწყობის სამსახურს, მერიამ გაითვალისწინა. რაც შეეხება ასპინძის ცენტრალური პარკის კეთილმოწყობას, ამ პროექტმა 2019 წლისათვის გადაინაცვალა“,– ამბობს ასპინძის საკრებულოს თავმჯდომარე მამუკა მელიქიძე.

ასპინძაში ბიუჯეტი 4 მილიონი ლარია. დოკუმენტი საკრებულოს 8 დეკემბერს გადაუგზავნეს.

8 დეკემბერს დააბრუნა შესწორებული პროექტი წარმომადგენლობით ორგანოში ნინოწმინდის მერიამ. მუნიციპალიტეტის მერის ანივარდ მოსოიანის განმარტებით, საკრებულოს ყველა შენიშვნა გაითვალისწინა. ნინოწმინდის მომავალი წლის ბიუჯეტის პროექტი 5 მილიონი ლარია.

საკრებულოს დეპუტატებს დაუბრუნდათ განსახილველად ბიუჯეტი ახალქალაქშიც. ახალქალაქის ბიუჯეტი 17 მილიონ ლარამდეა.

ამ ეტაპზე დოკუმენტის საჯარო განხილვები უნდა დაიწყოს. განხილვები ჯერ ჩანიშნული არცერთ მუნიციპალიტეტში არ არის.

[ლუბა გიორგაძე, სამცხე–ჯავახეთი]