ვალების განულების პროცესი 15 დეკემბერს დაიწყება

მამუკა ბახტაძემ ჭარბვალიანობის პრობლემასთან დაკავშირებით ახალი ინიციატივა წარადგინა. ამ ინიციატივის მიხედვით, 600 000 მოქალაქეს 31 დეკემბრამდე ბანკებისა და საფინანსო სექტორის მიმართ არსებული ჯამში მილიარდნახევრიანი ვალი გაუნულდება: "600 000 მოქალაქე და მათი ოჯახები 31 დეკემბრამდე გარანტირებულად ამოვა მოვალეთა რეესტრიდან და ვალების გარეშე შეხვდება ახალ წელს. ხაზგასმით აღსანიშნავია, რომ ამ კატეგორიაში შედის თითქმის 150 ათასი სოციალურად დაუცველი და ათეულობით ათასი შეზღუდული შესაძლებლობის მქონე პირი. მიმდინარეობს მუშაობა მოვალეთა რეესტრის ბაზებზე", – ამბობს პრემიერი.

იმისთვის რომ პირს ვალი ჩამოეწეროს, თითოეულ ფინანსურ კომპანიაში მისი ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს; ასევე, მინიმუმ ბოლო ერთი წლის განმავლობაში არ უნდა ჰქონდეს სესხი გადახდილი.

როგროც პრემიერი ამბობს, ვალი არ ჩამოეწერებათ "ვივუსის" კლიენტებს: "ამ კომპანიასთან ვერ შევთანხმდით".

ბახტაძის ინფორმაციით, ე.წ. შავ სიაში მყოფილი ადამიანების 95 პროცენტს სწორედ 2 000 ლარამდე "ძირი თანხის" მქონე დავალიანება აქვთ.

[sknews.ge]