ახალციხეში მცხოვრებ თამარს [სახელი შეცვლილია] ოთხი სხვადასხვა ორგანიზაციიდან (netcredit.ge, Moneyman.ge,Minicredit.ge, crediton.ge) ონლაინ სესხი აქვს აღებული. ჯამში ვალის რაოდენობა 1 575 ლარია, თუმცა ვერ იხდის და ამიტომ შავ სიაშია. მას იმედი ჰქონდა, რომ განულების პროგრამაში მოხვდებოდა, თუმცა ასე არ აღმოჩნდა.
„არ ვიცი მიკროსაფინანსო ორგანიზაციებმა ჩემი სესხი რა კრიტერიუმებით შეარჩიეს და რატომ არ გადასცეს „ქართუ“ ფონდს. პრემიერ–მინისტრმა საჯაროდ განაცხადა, რომ ის სესხებიც კი, რომლებიც აღსრულებასა და სასამართლო წარმოებაშია, განულდება. მე ამ კუთხით ყველა კრიტერიუმს ვაკმაყოფილებ, მაგალითად, სესხი 2018 წლის განმავლობაში არ დამიფარავს“, – გვიყვება თამარი.
როგორც თავად ამბობს, მას პრობლემური სესხების კომპანიაში განუცხადეს, რომ ის თუ რომელი მსესხებლის მონაცემებს გადასცემენ „ქართუ“ ფონდს გასანულებლად ამას შიდა კრიტერიუმებით არეგულირებენ: „ამ ჩვენ შიდა კრიტერიუმებს ვერ აკმაყოფილებო. მატყუებენ, შენი საქმე სასამართლოშია გადაცემულიო, თუმცა ასეც რომ იყოს, ვალდებულები არიან გამოითხოვონ და ვალის გასანულებლად ჩემი მონაცემები „ქართუ“ ფონდს გადასცენ“.
Ccloan.ge–ისგან აღებული სესხის გამო ხელფასი დაუყადაღეს ახალციხეში მცხოვრებ კიდევ ერთ პირს: „სამი შვილი მყავს და მეოთხეს ველოდები, ფინანსურად ძალიან გვიჭირს, 250 ლარი გამოვიტანე და ახლა პროცენტებიანად 750 ლარია. აღსრულების გადაწყვეტილებით სწორედ ეს თანხა უნდა დავფარო, მე კი არ შემიძლია. იმედი მქონდა, რომ მეც განულების პროგრამაში მოვხვდებოდი, მაგრამ უარი მითხრეს“.
ისევე როგორც სამი შვილის დედამ, ასევე თამარმაც საქართველოს პრემიერ–მინისტრს მამუკა ბახტაძეს წერილები გაუგზავნეს, თუმცა ჯერ პასუხი არ მიუღიათ.
როგორც „სამხრეთის კარიბჭეს“ „ქართუ“ ფონდის ცხელი ხაზის ოპერატორმა განუმარტა, იმას თუ რომელ მსესხებელს გაუნულდება ვალი საფინანსო ორგანიზაციები წყვეტენ, ისინი წყვეტენ რომელი მსესხებელი ჩასვან განულების პროგრამაში და რომელი არა.
„ვალების განულების პროგრამაში ჩაერთვება ის მსესხებელი, რომელსაც ერთ საფინანსო ორგანიზაციაში 2000–ლარამდე სესხი აქვს და ბოლო ერთი წლის განმავლობაში გადახდა არ უფიქსირდება. გარდა ამისა, აღნიშნული ორგანიზაციები უნდა თანამშრომლობდნენ creditinfo.ge–სთან. ეს არის საერთო ბაზა, სადაც კრედიტების შესახებ ინფორმაცია გროვდება. ინფორმაციას რასაც ჩვენ გადმოგვცემენ აქ უნდა იყოს ასახული. თუმცა, საფინანსო ორგანიზაციებზეა დამოკიდებული ვალების განულების პოგრამაში მსესხებელს ჩასვამენ თუ არა“, – გვითხრეს ფონდ „ქართუში“.
მათივე განმარტებით, იმ შემთხვევაში, თუ მსესხებლის საქმე აღსრულებლის ეროვნულ ბიუროში ან სასამართლოშია, მაშინ საფინანსო ორგანიზაციამ ეს საქმე თავად უნდა გამოითხოვოს უკან: „ჩვენ არ გვაქვს ამ მხრივ შეზღუდვა, ორგანიზაციებმა თავად უნდა გამოითხოვონ აღსრულებიდან და სასამართლოდან მათი საქმეები და ჩვენ გადავიხდით, თუმცა გამოთხოვის საკითხსაც თავად ორგანიზაცია წყვეტს“.
„სამხრეთის კარიბჭე“ სხვადასხვა საფინანსო ორგანიზაციის სესხის ოფიცრებს ესაუბრა. მათი განმარტებით, მოსახლეობის მოთხოვნის მიუხედავად აღსრულების ეროვნული ბიუროდან და სასამართლოდან არცერთი საქმის გამოტანას არ გეგმავენ, რადგან მათ საქმის წარმოებისთვის გარკვეული ხარჯი უკვე გასწიეს.
„ყველა საფინანსო ორგანიზაციას თავისი კრიტერიუმები აქვს. ერთ– ერთი და მნიშვნელოვანი ის არის, რომ თუ დაწყებულია სასარჩელო წარმოება, ან ლოჯისტიკის ეტაპზეა ეს საქმე , მაშინ ეს საკითხი არ გადავა განულების სიაში. შესაძლებელია მსესხებელს ჯერ სასამართლოდან, ან აღსრულებიდან არ მისვლია ოფიციალური წერილი, თუმცა ამ საკითხზე ჩვენ არაერთხელ გავაფრთხილეთ. შესაძლებელია, საკითხი იყოს ლოჯისტიკის ეტაპზე, მიმდინარეობს მუშაობა რომ დაიწყოს სასარჩელო წარმოება, ამისთვის კი გროვდება დოკუმენტები. ამ შემთხვევაში მსესხებელს არ გაუნულდება დავალიანება, ის თანხას სასამართლოს გზით გადაიხდის“, – ამბობს Credium.ge-ს სესხის ოფიცერი.
ფონდი „ქართუ“ იმ მოქალაქეებს, რომლებიც მიიჩნევენ, რომ საფინანსო ორგანიზაციებმა მათ მიმართ არასამართლიანი გადაწყვეტილება გამოიტანეს, ისევ იმ ორგანიზაციებთან ამისამართებენ, რომლებშიც მათ სესხი აიღეს: „მიკროსაფინანსო ორგანიზაციების და ბანკების საკითხში ჩვენ ჩარევის უფლება არ გვაქვს .თუ მოქალაქეებს პრეტენზიები აქვთ უნდა მიმართონ ამ ორგანიზაციებს და მოითხოვონ დასაბუთება იმაზე თუ რატომ არ არიან სიაში. აქვე გეტყვით, რომ გადაწყვეტილებას, ვინ მოახვედრონ სიაში თავად ბანკები იღებენ. ჩვენ არ გვაქვს კონრტოლის უფლება, თვითონ ადგენენ ამ სიებს“.
ვებგვერდი vali.ge, რომლის დომენის მფლობელია “ქართუ”, 2019 წლის 31 დეკემბრამდე იმუშავებს: “ვებ-გვერდი შექმნილია და განკუთვნილია სოციალური მიზნებისთვის, კერძოდ, „სესხების პატიების პროექტის“ ფარგლებში მოქცეული პირებისთვის/მსესხებლებისთვის ინფორმაციის მიწოდების, მსესხებლების მიერ პროექტში მოქცეულ დავალიანებაზე მონაცემების გადამოწმების და პროექტის ფარგლებში სასესხო ვალდებულებების პატიების პროცესის ხელშეწყობის მიზნით. ვებ-გვერდი იფუნქციონირებს 2019 წლის 31 დეკემბრის 18:00 საათამდე.
ვებგვერდზე vali.ge საქართველოს მოქალაქეებმა პირადი ნომერი და დაბადების თარიღი უნდა მიუთითონ.
იხილეთ ორგანიზაციების ჩამონათვალი:
[თინათინ ზაზაძე, ახალციხე]