აბასთუმანში 17 წლის მოზარდს მანქანა დაეჯახა

შემთხვევა დღეს, 22 ივლისს, დაბა აბასთუმანში, საღამოს მოხდა. როგორც ადგილობრივები ჰყვებიან, 17 წლის მოზარდს, ეტლით მოსარგებლე 12 წლის პირი მიჰყავდა. როცა მათკენ მიმავალი მანქანა დაინახა და მიხვდა, რომ მძღოლი ვეღარ ამუხრუჭებდა, ეტლიანი ბავშვი ტროტუარისკენ მოისროლა, რა დროსაც მანქანა მას ბორდიურზე დაეჯახა.

მათივე განმარტებით, მძღოლი ფხიზელი იყო და შემთხვევის შემდეგ ადგილზე დარჩა. ავტომანქანის მოცურების მიზეზად მაცხოვრებლები წვიმას ასახელებენ.

ავარიის შემდეგ, 17 წლის ბიჭი მცირედ დაშავდა, იგი სასწრაფო–სამედიცინო დახმარების ბრიგადამ ადიგენის საავადმყოფოში გადაიყვანა. როგორც სამედიცინო დაწესებულებაში განმარტავენ, მოზარდს არანაირი დაზიანებები არ აღენიშნებოდა – "მხოლოდ ხელზე ჰქონდა ნაკაწრი, აღმოვუჩინეთ შესაბამისი დახმარება და გავწერეთ", – განმარტავენ ადიგენის საავადმყოფოში.

რაც შეეხება 12 წლის ეტლით მოსარგებლე პირს, იგი სასწრაფომ ახალციხის სამედიცინო დაწესებულებაში გადაიყვანა. "თავის საშუალო სიმძიმის დაზიანება მიიღო, სასწრაფოს ბრიგადამ ადგილზე პირველადი დახმარება აღმოუჩინა, რის შემდეგაც ახალციხის საავადმყოფოში გადავიყვანეთ", – გვიხსნიან სასწრაფო–სამედიცინო დაწესებულებაში.

ამ დროისათვის, ახალციხის რეფერალურ საავადმყოფოში, 12 წლის მოზარდს გამოკვლევები უტარდება.

როგორც "სამხრეთის კარიბჭეს" შინაგან საქმეთა სამინისტროში განუცხადეს, მომხდარზე ძიება სისხლის სამართლის კოდქსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[თაკო ფეიქრიშვილი, ადიგენი]