ნინოწმინდის საოლქომ ორი საჩივრიდან ერთი დააკმაყოფილა

ნინოწმინდის საოლქო საარჩევნო კომისიაში შესული საჩივრებიდან ერთი, N25 სოფელ სათხას, მეორე კი N26 ნინოწმინდის უბანს ეხებოდა.

სათახაში „მრავალეროვანი საქართველოს“ საჩივრის მიხედვით, დარღვევა წილისყრის ფუნქციების გადანაწილებას ეხებოდა, კერძოდ, კომისიის წევრმა „ნაციონალური მოძრაობიდან“ წილისყრაში მონაწილეობის მიღებაზე უარი თქვა. საოლქო კომისიამ ამ პირს სიტყვიერი შენიშვნა მისცა.

ნინოწმინდის უბანზე კი საჩივარი იმის გამო დაიწერა, რომ „მრავალეროვანი საქართველოს“ წარმომადგენელი უბანში არ შეუშვეს. საჩივრის მიხედვით, მას ბეიჯი და პირადობა „ნაციონალური მოძრაობის“ წარმომადგენელმა მოსთხოვა. როცა მას ბეიჯი და პირადობაც წარუდგინეს, განაცხადა, რომ ორივე ყალბია და ამიტომ უბანზე დამკვირვებელს არ დაუშვებდა.
ეს საჩივარი საოლქო კომისიამ არ დააკმაყოფილა.

„მომჩივანს, ამის დამადასტურებელი არანაირი მტკიცებულება არ ჰქონდა ამიტომ არ დავაკმაყოფილეთ. თუმცა, მაინც მივწერეთ ამ ორგანიზაციას, რომ თუ რაიმე მტკიცებულება აქვს წარმოგვიდგინოს“, – გვითხრა ნინოწმინდის საოლქო კომისის თავმჯდომარის მოადგილემ გია გაჩეჩილაძემ.

[ლუბა გიორგაძე, ნინოწმინდა]