ნიკა მელია:არჩევნებზე ახალქალაქსა და ნინოწმინდაში უპრეცედენტოდ მობილიზებულები ვიქნებით

„მწყობრიდან არის გამოსული მთელი „ქართული ოცნება“, ახალქალაქსა და ნინოწმინდაში ენძელ მკოიანი ასრულებს პოლიტიკურ დავალებას. ვერ ვაღირსებთ ბიძინა ივანიშვილს იმას, რაც მას ძალიან უნდა. არ წამოვეგებით პროვოკაციებზე. ძალიან მშვიდობიანად, ძალიან ორგანიზებულად მეორე ტურში საქართველოს მოსახლეობის აბსოლუტური უმრავლესობა უარს ეტყვის ენზელ მკოიანებს, ფარცხალაძეეებს, სუბელიანებს, გახარიებს და ივანიშვილებს. ფიზიკურად ვიქნებით ახალქალაქსა და ნინოწმინდაში და ვიქნებით გარანტი აქ მცხოვრები მოსახლეობის უსაფრთხოებისა, იმიტომ, რომ აქ არ არსებობს კომპეტენტური ორგანო, რომელიც დაიცავს მოქალაქეების უფლებებს“, – ამბობს ნიკა მელია.

მისი თქმით, ახალქალაქში დაპირისპირების დაწყების მიზეზი „ოცნების“ დეპუტატი ენზელ მკოიანი და მისი ძმაა.

„გაერთიანებული ოპოზიციის წევრი მიხეილ აგაბაბიანი, რომელიც ამავე დროს არის ცესკოში წარმომადგენელი, გადაადგილდებოდა საკუთარი ავტოსატრანსპორტო საშუალებით რა დროსაც „ქართული ოცნების“ მაჟორიტარმა დეპუტატმა ენძელ მაკოიანმა ძმასთან ერთად გააჩერა და ფიზიკური შეურაცხყოფა მიაყენა. შემდეგ გადმოიყვანეს მანქანიდან და მას ოცამდე შეიარაღებული პირი ხელკეტებით და ე.წ კასტეტებით გაუსწორდა“, – განაცხადა ახალქალაქში ყოფნისას ნიკა მელიამ.

მისი თქმით, აგაბაბიანის ცემის შემდეგ, დაახლოებით 20 კაციანი ჯგუფი ახალქალაქში გრიგოლ ვაშაძის შტაბთან მივიდა: „შტაბთან მდგომ ყველა წევრს დაუწყეს უმოწყალო ცემა. ვინც ამ დროს შენობაში იმყოფებოდა და გარეთ გამოვიდა იმათმაც დანარჩენების ბედი გაიზიარეს. ამ ყველაფერს ენძელ მკონიანის ზონდერ ჯგუფები აკეთებენ“.

შეგახსენებთ, რომ ენმ–ს ოფისზე თავდასხმა დღეს, 30 ოქტომბერს, დაახლოებით, 13:00 საათზე მოხდა. ენმ–ს რაიოული ორგანიზაციის ხელმძღვანელი აშოტ რაისიანი ამბობს, რომ მას და მის თანაგუნდელებს თავს, ახალქალაქსა და ნინოწმინდაში "ოცნების" დეპუტატი ენზელ მკოიანი და მისი ძმა დაესხნენ. შემთხვევის შედეგად ოთხი ადამიანი დაშავდა და ოთხივე მათგანი ახალქალაქის ცენტრალურ საავადმყოფოში გადაიყვანეს. მათ შორის ერთის მდგომარეობა მძიმეა და იგი ამ წუთებში თბილისში გადაჰყავთ. სამს კი, როგორც ექიმები აცხადებენ სახის დაზიანებები თავისა და სახის არეში აქვთ მიყენებული.

შინაგან საქმეთა სამინისტრო მომხდარს სსკი–ის 239 მუხლის მეორე და მესამე ნაწილით იძებს. რაც გულისხმობს წინასწარი შეთანხმებით ჯგუფის მიერ ჩადენილ ხულიგნობას, რა დროსაც გამოყენებული იყო ცეცხლსასროლი იარაღი, ან იარაღად სხვა საგანი.

[sknews.ge]