ხვედელიანის ადვოკატი: გამორიცხულია მამუკამ ქვეყანა დატოვოს

უახლოეს ერთ თვეში სამცხე-ჯავახეთის საოლქო პროკურატურა ხვედელიანის საქმესთან დაკავშირებით ახალციხის რაიონული სასამართლოს გადაწყვეტილებას გაასაჩივრებს. მანამდე კი პროკურატურა რევაზ არუცევის მკვლელობის ფაქტს იძიებს. არუცევის ოჯახის წევრები 22 წლის ბიჭის მკვლელობაში მამუკა ხვედელიანს ადანაშაულებენ.

სამცხე-ჯავახეთის ოლქის პროკურორი გიორგი პაპუაშვილი აცხადებს, რომ ამ საქმეზე ძალიან ბევრი მოქმედებებია ჩატარებული: „სამწუხაროდ, თავიდან მაგ საქმეს, იმისთვის, რომ ცხელ კვალზე გახსნილიყო დანაშუალი, ბევრი რამ დააკლეს. არაპროფესიონალიზმით თუ სხვა მიზეზით ჯერ-ჯერობით დაუდგენელია. დღეს კი, წლების გასვლის გამო, საქმის გამოძიება რთულია“.
ამ დრომდე აღნიშნულ საქმეში ხვედელიანის ბრალეულობა გამოკვეთილი არ არის.

„იმისთვის, რომ პირს ბრალი დასდო, უნდა შეაგროვო მტკიცებულება. იმ ფონზე, როცა მამაკაცის გაუპატიურებაზე ამხელა მტკიცებულებები არსებობდა, მაგრამ სასამართლომ მაინც გაამართლა, ვცდილობთ ამჯერად მტკიცებულებები კიდევ უფრო მრავლად გვქონდეს, რომ ბოლოს და ბოლოს სასამართლომ მიიღოს ეფექტური გადაწყვეტილება“, - აცხადებს პაპუაშვილი.

ხელახლა სისხლის სამართლებრივი დევნის მოლოდინისა და იმ საპროტესტო აქციების ფონზე, რომლებიც მისი დარბაზიდან გათავისუფლების შემდეგ პერმანენტული გახდა, სავარაუდო ხდება მოსაზრება იმის შესახებ, რომ შესაძლოა ხვედელიანმა საქართველო დატოვოს და გამოძიებას მიემალოს.

ოლქის პროკურორი მიიჩნევს, რომ ამ დროისთვის ხვედელიანს არანაირი საფუძველი არ აქვს ქვეყნიდან წავიდეს, რადგან იგი სასამართლოს მიერ გამართლებულია. რაც შეეხება იმას, აქვს თუ არა უფლება საზღვარი გადაკვეთოს - არანაირი შეზღუდვა არ არსებობს. როგორც უკვე აღვნიშნეთ, იგი არუცევის მკვლელობაში ამ დრომდე ბრალდებული არ არის.

ხვედელიანის ადვოკატი მერაბ გოგოლაძე გვარწმუნებს, რომ იგი არსად წასვლას არ აპირებს: „გამორიცხულია მამუკამ ქვეყანა დატოვოს. ეს მის ინტერესებშიც შედის, რადგან აცხადებს, რომ უდანაშაულოა და სურს ეს დაამტკიცოს კიდეც“.

[თამუნა უჩიძე, ახალციხე]