‘ძნელია განსაზღვრო ვინ გაიმარჯვებს’ – ბორჯომი არჩევნებამდე ორი დღით ადრე [Photo\Video]

ბორჯომში, ისევე, როგორც სამცხე–ჯავახეთის სხვა მუნიციპალიტეტებში წინასაარჩევნოდ პრეზიდენტობის მხოლოდ სამი კანდიდატი აქტიურობს. როგორც ქალაქში, ასევე სოფლებში „ნაციოანალური მოძრაობის“ საპრეზიდენტო კანდიდატის გროგოლ ვაშაძის, „ოცნების“ მხარდაჭერილი კანდიდატის სალომე ზურაბიშვილის და „ევროპული საქართველოს“ საპრეზიდენტო კანდიდატის დავით ბაქრაძის პლაკატებია გაკრული. მოსახლეობასთან შეხვედრებსაც ამ სამი საპრეზიდენტო კანდიდატის აქტივისტები მართავენ.

ბორჯომელი რუსუდან ბედიაშვილი ამბობს, რომ წინა არჩევნებთან შედარებით წელს მუნიციპალიტეტში სიმშვიდეა: „ნორმალური საარჩევნო გარემოა. ძნელია განსაზღვრო ვინ გაიმარჯვებს. მე სალომე ზურაბიშვილის საარჩევნო პროგრამა მომწონს. მომწონს მისი გეგმები საგარეო ურთიერთობის კუთხით“.

არცერთი საპრეზიდენტო კანდიდატის პროგამას არ იცნობს პენსიონერი ნაზი დემეტრაძე. იგი იფქრობს, რომ არჩევნებში ის გაიმარჯევებს, ვისაც მხარს მმართველი გუნდი უჭერს: „პრეზიდენტიც არჩეულია და მისი მოდგილეებიც. სალომე იქნებაო ყველა ამბობს. ჩვენ ვინ გვეკითხება რამეს უბრალო ნამცეცი ვართ უპატრონო ქვეყანაში“.

დავით ბაქრაძის მხარდამჭერია და მისი საარჩევნო პროგრამაც მოსწონს გულნარა ხითარიშვილს: „ ბაქრაძე მომწონს, სალომე არა, ეგ ვერ გაართმევს თავს ქვეყნის მართვას“.

ნუნუ ხაჩიძე ამბობს, რომ 28 ოქტომბერს არჩევნებზე ოჯახთან ერთად მივა: „მე მხარს სალომე ზურაბიშვილს ვუჭერ“.
ზურაბიშვილის მხარდამჭერია ბორჯომელი ვალერი გოგოლაძეც: „ვიცი რომ გაიმარჯვებს და ვნახოთ რას გააკეთებს. მე იმ კანდიდატს ვემხრობი, რომელიც მთავრობას უნდა“.





ბორჯომში არათანაბარ საარჩევნო გარემოსა და თვითმმართველობის მხრიდან ადმინისტრაციული რესურსის გამოყენებაზე საუბრობს ენმ–ს რაიონული ორგანიზაციის წარმომადგენელი ბაკურ გელაშვილი: „სიპ–ების და ააიპ–ების თანმაშრომლები აქტიურად არიან ჩართული წინასაარჩევნო აგიტაციაში. საარჩევნო ადმინისტრაციებშიც ბევრია პედაგოგი, ასევე, ააიპ–ების და სიპ–ების თანამშრომლები. გარდა ამისა, სალომე ზურაბიშვილს პლაკატებს სადაც აკრავენ ჩვენი კანდიდატისას ანადგურებენ იქ“.



გელაშვილის თქმით, „ოცნების“ აქტივისტები სოფლებში დადიან და ამომრჩევლებს ხმის სანაცვლოდ უფასო მედიკამენტებით უზრუნველყოფას პირდებიან: „ბორჯომის მერია სოციალური პროგრამით, იმ მოქალაქეებს ეხმარება, ვისაც ერთი ღამე მაინც აქვს სტაციონარში გათენებული. ექიმის მიერ დანიშნული მედიკამენტების შეძენას უფინანსებენ. ახლა დადიან „ოცნების“ აქტივისტები და მოქალაქეებს ეუბნებიან ფორმა–100 მოგვეცით და უფასო წამლებს მოგცემთო. წინასაარჩევნოდ ბევრი წამალი გასცეს უფასოდ. ვაპირებთ მერიიდან ეს ინფორმაცია გამოვითხოვოთ და საჯარო გავხადო“.



ადმინისტრაციული რესურსის გამოყენებაზე საუბრობს დავით ბაქრაძის შტაბის წარმომადგენელი ბორჯომში ბაქარ შირაძეც: „სოფელ–სოფელ დავდივართ და მოსახლეობას ვხვდებით. შეიძლება ერთ სოფელში სამჯერაც ავიდეთ. ამ არჩევნებზე ხელისშემშლელი ფაქტორები არ მქონია, სხვაგან არ ვიცი რა ხდება. მარტო პლაკატებს ხევენ. წელს უფრო გაზრდილია ჩვენი მხარდამჭერების სია, მომატებულია ჩვენი პარტიის მიმართ სიმპათიები“.



„ქართული ოცნების“ წარმომადგენელი ბორჯომში, გიორგი ფერაძე ოპონენტების ბრალდებებს უსაფუძვლოს უწოდებს: „მშვიდი და სტაბილური გარემოა. სალომე უალტერნატივო კანდიდატია“.

რაც შეეხება ადმინისტრაციული რესურსის გამოყენებას „ოცნების“ წარმომადგენელი ამბობს, რომ: „თანამშრომლები, რომლებზეც ოპონენტები საუბრობენ კანონმდებლობის შესაბამისად მოქმედებენ და შვებულებებში არიან. რაც შეეხება მედიკამენტების დარიგებას ეს სიცრუეა, ჩვენ სოციალურ პროგრამებს ვაცნობთ, ვეუბნებით როგორ შეიძლება ისარგებლონ და მიიღონ დახმარება“.



[თინათინ ზაზაძე, ნანა ინასარიძე–ბორჯომი]