ზურაბიშვილის შტაბები ‘ოცნების’ ოფისებში – 'ამით აუდიტის სამსახური უნდა დაინტერესდეს'

„ქართულმა ოცნებამ“ ცხრა ოქტომბერს ოფიციალურად გამოაცხადა, რომ 2018 წლის საპრეზიდენტო არჩევნებში მხარს დამოუკიდებელ კანდიდატს სალომე ზურაბიშვილს უჭერდა. ამ დროისთვის „ქართული ოცნების“ ოფისები რეგიონის ყველა მუნიციპალიტეტში ფუნქციონირებდა. ორ–სამ ოქტომბრამდე კი, ვიდრე ზურაბიშვილი სამცხე–ჯავახეთში შეხვედრებს გამართავდა, მუნიციპალიტეტებში „ოცნების“ ოფისები მის საარჩევნო შტაბებად გადაკეთდა.

რეგიონში, სალომე ზურაბიშვილის საარჩევნო შტაბების ხელმძღვანელები „ქართული ოცნების“ წევრები არიან. ახალციხეში საარჩევნო შტაბს ახალციხე–ადიგენის მჟორიტარი დეპუტატი გიორგი კოპაძე, ახალქალაქში საკრებულოს თავმჯდომარე ნაირი ირიციანი, ხოლო დანარჩენ მუნიციპალიტეტებში მერები ხელმძღვანელობენ.

რა ფორმით მოხდა „ქართული ოცნების“ მიერ სალომე ზურაბიშვილისთვის ოფისების გადაცემა, შტაბებში არ საუბრობენ.




„ისე გადაეცა „ოცნების“ შტაბი ბორჯომში ზურაბიშვილს, როგორც ეს ყველა სხვა მუნიციპალიტეტში მოხდა. არ მცალია მაგაზე სალაპარაკოდ ახლა“, – გვითხრა სალომე ზურაბიშვილის შტაბის ხელმძღვანელმა და ბორჯომის მერმა ლევან ლიპარტიამ.

ნინოწმინდის „ქართული ოცნების“ საოლქო ორგანიზაციის თავმჯდომარე გია ძამოიანი ამბობს, რომ „ოცნების" ოფისის მესაკუთრესთან მათ ხელშეკრულება გააუქმეს, შემდეგ კი ფართის ქირაობაზე მასთან ზურაბიშვილის საარჩევნო შტაბმა ახალი ხელშეკრულება დადო: „როგორც ვიცი ასე მოხდა ყველგან“.




შეკითხვაზე, რა ფორმით გადაეცა „ოცნების“ ოფისები დამოუკიდებელ კანდიდატს, ზურაბიშვილის შტაბში გვითხრეს, რომ ამაზე პასუხის მისაღებად „ოცნების“ სათაო ოფისში უნდა დაგვერეკა.

პარტია „ქართული ოცნების“ ცენტრალურ ოფისში კი განაცხადეს, რომ ზურაბიშვილმა საარჩევნო შტაბებისთვის მუნიციპალიტეტებში ოფისები იქირავა და შესაბამისად თანხასაც თავად იხდის.




„ახალგაზრდა იურისტთა ასოციაციის“ იურისტი ქეთი ბებიაშვილი ამბობს, რომ თუ ფართები სალომე ზურაბიშვილის საარჩევნო შტაბს ნაქირავები აქვს, ეს კანონდარღვევა არ არის, თუმცა, შესძლოა აქ ადმინისტრაციული რესურსის ირიბი გამოყენების ფაქტები იკვეთებოდეს და ამიტომ ამ საკითხით სახელმწიფო აუდიტის სამსახური უნდა დაინტერესდეს: „უნდა იქნეს სწორად გამოკვლეული, ადგილი ხომარ აქვს სახელმწიფო ბიუჯეტის გამოყენებას, ან „ოცნების“ დაფინანსების გამოყენებას ზურაბიშვილის სასარგებლოდ“.

სავარაუდოდ, ადმინისტრაციული რესურსის ირიბ გამოყენებაზე საუბრობს „საერთაშორისო გამჭვირვალობა–საქართველოს“ იურისტი გიგი ჩიხლაძეც: „ხელშეკრულებებია სანახავი იმის შესამოწმებლად ფორმალურადაა ისინი გაფორმებული თუ არა, ასევე, იმის გასარკვევად შეღავათიან ფასში ხომარ აქვს ზურაბიშვილს ეს ოფისები ნაქირავები და რამდენად რეალურ თანხას იხდის ამისთვის. თუმცა, ეს ხელშეკრულებები საჯარო არაა. ერთადერთი სადაც ეს შეიძლება აისახოს ზურაბიშვილის დეკლარაციაა“.




სალომე ზურაბიშვილს ბოლო დეკლარაცია შევსებული 2017 წლის 16 იანვარს აქვს. იურისტები ფიქრობენ, რომ ვიდრე იგი ახალ დეკლარაციას შეავსებს, ამ საკითხით აუდიტის სამსახური დაინტერესდება.




[ლუბა გიორგაძე, ახალციხე]