ასპინძა საპრეზიდენტო არჩევნებამდე 10 დღით ადრე [Photo/Video]
მთავარი → სიახლე, პოლიტიკა, არჩევნები19.10.2018საპრეზიდენტო არჩევნებამდე 10 დღე დარჩა. როგორია წინასაარჩევნო გარემო ასპინძაში და რომელ კანდიდატს ანიჭებენ ადგილობრივები უპირატესობას.
ხალხი
25 პრეზიდენტობის კანდიდატიდან, ასპინძის მუნიციპალიტეტში მხოლოდ სამის, გრიგოლ ვაშაძის, სალომე ზურაბიშვილის და დავით ბაქრაძის პლაკატებია გაკრული. ადგილობრივები ამბობენ, რომ არჩევანსაც ამ სამ კანდიდატს შორის გააკეთებენ, რადგან მათ შესახებ უფრო მეტი იციან.
„ბევრი არაფერი ვიცი, მაგრამ ჩემი აზრით ვაშაძეს, ბაქრაძესა და ზურაბიშვილს უფრო მეტი შანსი აქვს გამარჯვების, ვიდრე დანარჩენს“, – ამბობს ხერთვისში მცხოვრები მალხაზ ხართიკაშვილი და ამატებს, რომ ვინც არ უნდა გაიმარჯვოს ცვლილებების მოლოდინი არ აქვს – „რას შეცვლის?! ბევრს არაფერს. პრეზიდენტს იმდენი უფლებამოსილება აღარ აქვს, როგორც ადრე ჰქონდა“.
დავით ბაქრაძის გამარჯვების იმედი აქვს ნაქალაქევში მცხოვრებ გაიოზ მაღრაძეს: „მის საარჩევნო პროგრამასაც ვიცნობ. პრეზიდენტის ფონდის ნახევარს ახალგაზრდების განათლებას მოახმარს“, – ამბობს და ამატებს, რომ მის სოფელში წინასაარჩევნოდ მხოლოდ იმ კანდიდატების წარმომადგენლები იყვნენ ხალხთან სასაუბროდ მისულები, ვისი პლაკატებიცაა გაკრული.
ხერთვისში მცხოვრები დავით ქავთარაძე ფიქრობს, რომ სამივე კანდიდატი გამოცდილია და ნებისმიერის გამარჯვება ქვეყნისთვის წარმატების მომტანი იქნება: „სამივესგან სიკეთეს ველოდები, მთავარია ვინც გავა დაასტაბილუროს ქვეყანა, ერთმანეთში შეთანხმდნენ, ნუ ექნებათ პოლიტიკური კინკლაობა. წინასწარ ვერ იტყვი ვინ გაიმარჯვებს. წასულმა პარტიამ და მთავრობამ შეიძლება გააუმჯობესოს, ან სულ აურიოს ყველაფერი“.
ასპინძაში მცხოვრები მაყვალა შალვაშვილი დარწმუნებულია, რომ გამარჯვებას მმართველი პარტიის მხარდაჭერილი კანდიდატი სალომე ზურაბიშვილი მოიპოვებს: „რაც თავი მახსოვს, სულ ხელისუფლების კანდიდატი იმარჯვებს. გვინდა არ გვინდა ეს ასეა, განა იმიტომ რომ ვინმე გვაძალებს. სახელმწიფო ვისაც დაუჭერს მხარს ვალდებული ხარ შენც მას დაუჭირო მხარი“.
ადგილობრივები ამბობენ, რომ წინა არჩევნებთან შედარებით ასპინძაში ამჯერად გარემო მშვიდია.
„ხალხი თავის ნებას თავისუფლად გამოხატავს. დაძალება არ ყოფილა. პედაგოგი ვარ და ამ დრომდე არავის უთქვამს მთავრობის კანდიდატს დაუჭირე მხარიო. ჩემი აზრით რეიტინგში ჯერჯერობით მთავრობის კანდიდატი ლიდერობს“, – ამბობს ასპინძელი იზა ქავთარაძე.
ასპინძელ მედეა წინწკალაძეს არცერთი პრეზიდენტობის კანდიდტი არ მოსწონს თუმცა, ფიქრობს, რომ უკეთესი იქნება თუ მმართველი გუნდის მხარდაჭერილი კანდიდატი გაიმარჯვებს: „თუ გავიდა ოპოზიციური კანდიდატი, ნებისმიერ რამეს ვეტოს დაადებს. პარლამენტი ვეტოს დაძლევს და ასე იქნება ჭიდილი ექვსი წელი. ყველანაირად ეცდებიან დაპირისპირებას, შეეცდებიან არეულობა შეიტანონ ქვეყანაში და მიაღწიონ ვადამდელ საპარლამენტო არჩევნებს. ვადამდელი არჩევნები არ არის კარგი, ეს ზედმეტი ხარჯია ქვეყნისთვის, ამიტომ ჯობია მმართველი გუნდის მხარდაჭერილმა კანდიდატმა გაიმარჯვოს, სიმშვიდე მაინც იქნება სხვა თუ არაფერი“.
პარტიები
ასპინძაში მხოლოდ სამი პარტიული ოფისი ფუნქციონირებს: „ქართული ოცნების“ მხარდაჭერილი კანდიდატის სალომე ზურაბიშვილის, „ევროპული საქართველოს“ და „ნაციონალური მოძრაობის“.
„ხალხის ტერორი მიდის, მთელი უშიშროება, გამგეობა, მერია, საკრებულო დადის და ეუბნებიან სამთავრობო კანდიდატს მიეცით ხმაო. რამდენიმე დღის წინ ბაქრაძის მიკროავტობუსი ჩამოვიდა, 11 სოფელი მოვიარეთ, უკან გამგეობის მანქანა გამოგვყვა და აკვირდებოდა ვინ მოვიდოდა ჩვენთან შეხვედრაზე, ოცნების დეპუტატები იწერდნენ ყველაფერს“, – ამბობს „ევროპული საქართველოს“ ასპინძის რაიონული შტაბის ხელმძღვანელი ფრიდონ ლონდარიძე.
მისი თქმით, მიუხედავად მმართველი გუნდის მცდელობისა ასპინძაში ხმების 50%–ს მაინც დავით ბაქრაძე დააგროვებს: „ხალხს ჩემი კანდიდატი უფრო მოსწონს“.
არ ეთანხმება ოპონენტს „ნაციონალური მოძრაობის“ ასპინძის შტაბის ხელმძღვანელი მალხაზ მოსიძე. იგი ფიქრობს, რომ მუნიციპალიტეტში მშვიდი წინასაარჩევნო გარემოა: „ერთი ისაა, რომ პლაკატებს აზიანებენ. ერთ სოფელში ათჯერ მაინც მომიწია ასვლა და ახალი პლაკატის გაკვრა. ასევე, როცა მოსახლეობასთან შეხვედრებს ვმართავთ, უკან პოლიცია მოგვყვება, ვითომ უსაფრთხოებას იცავენ, არადა აკვირდება ვინ გამოდის ჩვენთან შესახვედრად“.
„ქართული ოცნების“ ასპინძის საოლქო ორგანიზაციის თავმჯდომარე და ასპინძის მუნიციპალიტეტის მერი როსტომ მაგრაქველიძე ამბობს, რომ წინასაარჩევნო გარემო მუნიციპალიტეტში მშვიდია: „ვინმე კონკრეტულ ფაქტს თუ მოიყვანს დაშინების, ან მუქარის?! პირიქით, საუკეთესო დროს და ადგილებს ვთავაზობთ შეხვედრებისთვის ოპოზიციას. ბაქრაძეც ბრძანდებოდა ასპინძაში, მანამდე დაგეგმილი ღონისძიება გადავდეთ და დარბაზი დავუთმეთ მას იმისთვის, რომ მსგავსი კითხვები არ გაჩენილიყო“, – ამბობს როსტომ მაგრაქველიძე და ამატებს – „მე ხელისუფლებას წარმოვადგენ და ვალდებული ვარ, თუ ვინმე ერთ კონკრეტულ ფაქტს მაინც იტყვის, რომ სოფელში ვინმე შედის და შეხვედრას უშლის, ან თუ საჯარო მოხელე სამუშაო საათებში პარტიულ შეხვედრას ესწრება, შეიტანონ საჩივარი და დააჯარიმონ ის პირი 2000 ლარით“.
საქართველოს საპრეზიდენტო არჩევნები 28 ოქტომბერს გაიმართება.