‘უკვე გადაწყვეტილია მთავრობაში, ვინ იქნება პრეზიდენტი’ – როგორ ხვდებიან არჩევნებს ადიგენში [Photo/Video]
მთავარი → სიახლე, პოლიტიკა, არჩევნები10.10.201818 დღეში საქართველო მეშვიდედ აირჩევს პრეზიდენტს. როგორია წინასაარჩევნო გარემო ადიგენში, რომელი პოლიტიკური პარტიები აქტიურობენ, რა განწყობა აქვთ ადგილობრივებს და რა დარღვევებზე საუბრობენ ოპოზიციური პარტიები.
ადიგენში დიდად არ შეიმჩნევა, რომ საპრეზიდენტო არჩევნებამდე ორ კვირაზე ცოტა მეტია დარჩენილი. აქ, დაბაშიც და სოფლებშიც, მხოლოდ პრეზიდენტობის სამი კანდიდატის პლაკატებს თუ შეხვდებით და ისიც ალაგ-ალაგ. საარჩევნო შტაბიც მხოლოდ სამია.
გაერთიანებულ ოპოზიცია „ძალა ერთობაშია“, ადიგენის ცენტრში „ნაციონალური მოძრაობითაა“ წარმოდგენილი. იქვეა „ევროპული საქართველოც“, მის გვერდით კი, „ქართული ოცნების“ ყოფილ ოფისში, მმართველი პარტიის მიერ მხარდაჭერილი დამოუკიდებელი კანდიდატის, სალომე ზურაბიშვილის შტაბია.
საარჩევნო შტაბების ხელმძღვანელები ამბობენ, რომ წინასაარჩევნოდ აქ მშვიდი გარემოა და მნიშვნელოვანი დარღვევები არ ყოფილა, თუმცა ოპოზიცია პლაკატების ჩამოხევასა და ამომრჩევლებზე ხელისუფლების გავლენაზე საუბრობს.
"ნაციონალური მოძრაობის" შტაბი ადიგენში
„შიში აქვს ხალხს, რომ მივდივართ შეხვედრებზე არ გვეკონტაქტებიან და ამბობენ, რომ შვილები დასაქმებული ჰყავთ და სამსახურებიდან გამოუგდებენ. არის ხოლმე მცდელობები ჩვენი პალკატების ჩამოხევისაც, მიუხედვად ყველაფრისა წინასწარ გეტყვთ რომ ჩვენი კანდიდატი გაიმარჯვებს, იმიტომ რომ მხარდაჭერა დიდი აქვს“, – ამბობს „ნაციონალური მოძრაობის“ ადიგენის რაიონული ორგანიზაციის თავმჯდომარე დავით ოგანეზიანი.
"ევროპული საქართველოს" შტაბი ადიგენში
პლაკატების ჩამოხევაზე ან სხვა კანდიდატების გადაკვრაზე საუბრობს „ევროპული საქართველოს“ ადიგენის რაიონული ორგანიზაციის თავმჯდომარე სიმონ პარუნაშვილი: „მცირე ექცესები მაინც იყო, საუბნო კომისიის არჩევნების დროს იყო ხარვეზები, რაზეც საჩივრები დავწერეთ, თუმცა ახლა სერიოზული აღარაფერია და ვფიქრობთ, რომ მშვიდ ვითარებაში მიმდინარეობს არჩევნები“.
სალომე ზურაბიშვილის შტაბი ადიგენში
მოსახლეობასთან შეხვედრებით არიან დაკავებულები, დამოუკიდებელი კანდიდატის სალომე ზურაბიშვილის შტაბის წევრებიც. „ყოველდღიურად ვხვდებით ამომრჩეველს. მშვიდი წინასაარჩევნო გარემოა. ჯერ ყველა სოფელში არ ვყოფილვართ, თუმცა აქტიურ წინასაარჩევნო კამპანიას განვაგრძობთ. კანდიდატი კიდევ ჩამოვა თუ არა ადიგენში, ეს ჯერ არ ვიცით“, – გვეუბნება სალომე ზურაბიშვილის შტაბის წარმომადგენელი იმედა სირბილაძე.
სამივე პოლიტიკური პარტიის პრეზიდენტობის კანდიდატები, დავით ბაქრაძე, სალომე ზურაბიშვილი და გრიგოლ ვაშაძეც უკვე შეხვდნენ ადიგენის ამომრჩეველს. აქედან ორმა, ვაშაძემ და ბაქრაძემ შეხვედრები სოფელ უდეშიც გამართეს.
ყველა პოლიტიკური ძალა დარწმუნებულია, რომ ადგილობრივების უპირობო არჩევანი, სწორედ მისი კანდიდატი იქნება.
მოსახლეობის შეფასება კი არაერთგავროვანია - ნაწილი მხარს მმართველი გუნდის მხარდაჭერილ კანდიდატს უჭერს, სწორედ იმიტომ, რომ მართველი გუნდის რჩეულია, ნაწილს სხვა კანდიდატებიც მოსწონს, ნაწილი კი საკუთარ არჩევანზე არ საუბრობს.
„სალომე ზურაბიშვილს ყველაზე მეტი პერსპექტივა იმიტომ აქვს, რომ გამოცდილებაც დიდი აქვს. ვფიქრობ, რომ თავის ამ უპირატესობას მოახმარს საქართველოს“, – გვეუბნება სოფელ მოხეს მკვიდრი მამუკა ვაშაყმაძე.
„სამხრეთის კარიბჭეს“ მიერ გამოკითხული მოქალაქეების უმრავლესობას არჩევნებზე და კანდიდატებზე აზრის გამოთქმა საერთოდ არ სურს და კომენტარისაგანაც თავს იკავებს.
„უკვე გადაწყვეტილია მთავრობაში, ვინ იქნება პრეზიდენტი, ეგ თქვენც იცით და მეც, ჩვენ ვინ გვეკითხება საერთოდ“,– მოკლედ გვპასუხობს აბასთუმნის მკვიდრი ელმირა ალიევა.
„სამხრეთის კარიბჭემ“, დაბის გარდა, ადიგენის ხუთი სოფელიც მოიარა. ყველაზე მეტი პლაკატი სოფლებში, არალსა და უდეშია. ყველაზე მეტგან გრიგოლ ვაშაძის ფოტოებს შეხვდებით, მათ შორის სოფლის ცენტრში, ყოფილი პრემიერ–მინისტრის, ვანო მერაბიშვილის ბიძის სახლის გარშემო. რაოდენობით შემდეგი დავით ბაქრაძის საარჩევნო მასალაა, ყველაზე ცოტა პლაკატი კი სალომე ზურაბიშვილს აქვს.
სოფელი უდე
საარჩევნო პლაკატები საერთოდ არ დაგვხვედრია მოხეში. სალომე ზურაბიშვილის ორი პლაკატი, ჩვენი იქ ყოფნისას დამოუკიდებელი კანდიდატის წარმომადგენელმა გამოაკრა. „სამხრეთის კარიბჭეს“ ადიგენში ყოფნის დროსვე განთავსდა სალომე ზურაბიშვილის ბანერი სოფელ არლის შესასვლელშიც.
სოფელი მოხე
2018 წლის საპრეზიდენტო არჩევნებში, 28 ოქტომბერს, პრეზიდენტობის 25 კანდიდატი მონაწილეობს, თუმცა ადიგენელებს სამის გარდა, არც სხვა კანდიდატები უნახავთ და არც მათი საარჩევნო პლაკატები.