ადიგენში ენმ–ს მხარდამჭერი ამბობს, რომ ‘ოცნების’ აქტივისტებმა მანქანა დაუზიანეს

შემთხვევა დღეს, 19 ოქტომბერს, დაახლოებით, 18:00 საათზე მოხდა. როგორც „სამხრეთის კარიბჭესთან“ ლალი ბოჩიკაშვილი სატელეფონო საუბარში ყვება, იგი თანაგუნდელებთან ერთად სოფელ აბასთუმანში მოსახლეობასთან წინასაარჩევნო შეხვედრებს მართავდა.

„ორ ქალთან ერთად ვიყავი ჩემი მანქანით, „ნისან მარჩით“. მანქანა სოფლის შესასვლელში გავაჩერეთ და ფეხით გავაგრძელეთ გზა. სოფლის ცენტრში რომ მივედით, „ოცნების“ აქტივისტები შეგხვდნენ, შვიდი–რვა ახალგაზრდა ბიჭი იყო, „ოცნების“ მაისურები ეცვათ და ხელშიც ზურაბიშვილის სააგიტაციო მასალა ეკავათ. დაცინვა დაგვიწყეს, ცოცხების პარტია ხართ, 400–ლარიანებიო, არ ავყევით. მანქანასთან რომ მოვბრუნდი და დავქოქე, საბურავი სულ დაშვებული იყო, შიგნით ხე ჰქონდა შერჭობილი. დარწმუნებული ვარ, რომ ეს მათ გააკეთე“, – ამბობს ბოჩკაშვილი.

ბოჩიკაშვილმა 112–ზე დარეკა, ადგილზე ამ წუთებში (20:40 საათი) სამართალდამცველები მუშაობენ.

ენმ–ს წარმომადგენლები ამბობენ, რომ „ოცნების“ არცერთ აქტივისტს არ იცნობენ. „არ ვიცით ვინ არიან, შუადღის მერე დაგვყვებიან. ერთ ხანდაზმულ მამაკაცს ვაშაძის ბუკლეტი მივეცი, ერთ–ერთი მვიდა, გამოართვა და გადახია“, – გვიყვება მაია ზაზაშვილი, რომელიც დღეს სოფელ აბასთუმანში ენმ–ს პრეზიდენტობის კანდიდატის გრიგოლ ვაშაძის სააგიტაციო მასალას ლალი ბოჩიკაშვილთან ერთად ავრცელებდა.

„ქართული ოცნების“ საოლქო ორგანიზაციის ხელმძღვანელი და ადიგენის მერი ზაქარია ენდელაძე ამბობს, რომ მომხდარის შესახებ არაფერი იცის: „წარმოდგენა არ მაქვს რაზე საუბრობთ, დავინტერესდები და გავარკვევ პარტიაში რა მოხდა“.

ენმ–ს წარმომადგენლების მიმართ შესაძლო ზეწოლის ფაქტებზე არაფერი იცის სოფელ აბასთუმანში მერის წარმომადგენელმა ვიქტორ მინაძემაც: „ოჯახის წევრი მყავს შეუძლოდ, მთელი დღე საავამდყოფოში ვიყავი, ავალ სოფელში და გავარკვევ“.

ადიგენის რაიონულმა სამმართველომ ძიება სსკ-ის 187-ე მუხლით დაიწყო, რაც სხვისი ნივთის დაზიანებას, ან განადგურებას გულისხმობს.

[თამუნა უჩიძე, ადიგენი]