აბასთუმანში თოფით მიყენებული ჭრილობებით 31 წლის ქალი გარდაიცვალა

შემთხვევა, დღეს, 26 ოქტომბეს, სოფელ აბასთუმანში, დაახლოებით, 18:30 საათზე მოხდა. მუცლის არეში სანადირო თოფით დაჭრილი ქალი სასწრაფო სამედიცინო დახმარების ჯგუფმა ახალციხეში, „იმედის“ კლინიკაში გადაიყვანა.

„ნაწლავები გარეთ ჰქონდა, სისხლისგან იცლებოდა, საოპერაციოში შეიყვანეს, მაგრამ გული გაუჩერდა და გარდაიცვალა“, – გვითხრეს საავადმყოფოში.

სოფელ აბასთუმანში მერის რწმუნებული ვიქტორ მინაძე ამბობს, რომ ქალი თოფით დაიჭრა, თუმცა როგორ, ეს არ იცის.

სოფელში ადგილობრივების ნაწილი კი „სამხრეთის კარიბჭესთან“ სატელეფონო საუბარში ამბობს, რომ ქალმა თავი მოიკლა.

შინაგან საქმეთა სამინისტრომ ძიება სსკ–ის 19–108–ე მუხლით დაიწყო, რაც განზრახ მკვლელობის მცდელობას გულისხმობს. თუმცა, უწყებაში ამბობენ, რომ ექსპერტიზის პასუხის შემდეგ შესაძლოა საქმე გადაკვალიფიცირდეს: „ვმუშაობთ სხვა ვერსიებზეც, მათ შორის თვითმკვლელობის მცდელობაზეც“.

გარდაცვლილს ორი მცირეწლოვანი შვილი დარჩა.

[sknews.ge]