ქეთევან ციხელაშვილი ახალქალაქის პირველ საჯარო სკოლას ესტუმრა

პედაგოგებთან შეხვედრისას ციხელაშვილმა ეთნიკური უმცირესობების წარმომადგენლებისათვის ქართული ენის შემსწავლელ პროგრამებზე ისაუბრა: „მსგავსი პროგრამების პარალელურად სახელმწიფო ეთნიკური უმცირესობების მშობლიური ენის შენარჩუნებაზეც ზრუნავს".

სახელმწიფო მინისტრმა ორენოვანი დამხმარე მასწავლებლების როლზე გაამახვილა ყურადღება და განაცხადა, რომ ეთნიკური უმცირესობების წარმომადგენლების მიერ ქართული ენის შესწავლის საქმეში მათ დიდი წვლილი შეაქვთ.

მოგვიანებით, სახელმწიფო მინისტრი მერვე კლასში ქართულის გაკვეთილს დაესწრო, რომელიც სწორედ დამხმარე ორენოვანმა მასწავლებელმა ჩაატარა. მოსწავლეებთან ერთად ქეთევან ციხელაშვილმა სახელმწიფო ენის შესწავლის აუცილებლობაზე იმსჯელა და განაცხადა, რომ ეს მათ ქვეყნის საზოგადოებრივ ცხოვრებაში სრულფასოვნად ჩართვის საშუალებას მისცემს.

„დღეს ბავშვები თავიანთ ოცნებებზე საუბრობდნენ და იმისათვის, რომ ეს ოცნებები ახდეს და ისინი საკუთარ სამშობლოში წარმატებულები იყვნენ, ხარისხიანი განათლება უნდა ჰქონდეთ. რა თქმა უნდა, კარგად უნდა იცოდნენ მშობლიური ენა და ასევე სახელმწიფო ენა, რომ მათთვის არც ერთი დახურული კარი არ არსებობდეს“, – ამბობს ციხელაშვილი.

[sknews.ge]