ახალციხეში ვეტერანების დღე აღნიშნეს

ადგილობრივი თითმმართველობის, ასევე, სამხარეო ადმინისტრაციის წარმომადგენლებმა და საქართველოს ტერიტორიული მთლიანობისათვის მებრძოლმა ვეტერანებმა ომში დაღუპულთა მემორიალთან ყვავილები მიიტანეს და სანთლები დაანთეს.

„ჩვენ დღეს ვიხსენებთ ჩვენს ვეტერანებს, ჩვენს გმირებს. ჩვენი სამშობლო მუდმივად ომებშია. ვალდებულები ვართ გვერდში დავუდგეთ ომში დაღუპული გმირების ოჯახებს“, – განაცხადა სამცხე–ჯავახეთის გუბერნატორმა ბესიკ ამირანაშვილმა.



მემორიალთან შეკრებილებმა მერიის შენობაში გადაინაცვლეს. აქ ვეტერანებს ნარდის თამაშში გუბერნატორი, ქალაქის მერი და სხვა საჯარო მოხელეები შეეჯიბრნენ. ამის შემდეგ კი ვეტერანებს შორის ნარდში ჩემპიონატი გაიმართა. მერიამ პირველ, მეორე და მესამე ადგილზე გასულებს სიმბოლური საჩუქრები გადასცა.

ახალციხის მერიამ დღესვე მუნიციპალიტეტში მცხოვრებ 11 ვეტერანს თანხა გადაურიცხა. 10–მა ვეტერანმა 200–200 ლარი, ერთმა კი, რომელიც პირველი ჯგუფის ინვალიდია, 250 ლარი მიიღო. ჯამში ფულადი დახმარებისთვის ბიუჯეტიდან 2 250 ლარი გამოიყო.

ვეტერანთა დღე საქართველოში ვეტერანების საქმეთა სახელმწიფო სამსახურის ინიციატივით 17 ოქტომბერს 2014 წლიდან აღინიშნება.

[მარიამ ბარძიმაძე, ახალციხე]