ახალციხეში კლასიკური მანქანების რალი გაიმართა [Photo]

„რალი ღიმილით“ ასე ჰქვია კონცეფციას, რომელსაც საფუძველი 2004 წელს ჩაეყარა.მისი მიზანია ერთად შეკრიბოს მსოფლიოს ყველა კუთხიდან ის მსურველები, რომლებსაც ჰყავთ ძველი კლასიკური მანქანები. გარბენი სახელწოდებით “Peaks of the Caucasus“ საქართველოში პირველად იმართება. რალის მონაწილეები საქართველოს სხვადასხვა კუთხეში დადიან.

ბობ მეიერი ჰოლანდიიდანაა, მას 1933 წლის „ბუგატი“ ჰყავს. იგი საკუთარი მანქანით მსოფლიოში მოგზაურობს: „ჩემ მანქანას რუკა ახატია, ამ მანქანით მთელს მსოფლიოში დავდივარ. 30 წელია ეს მანქანა მყავს და 100 000 კილომეტრზე მეტი მაქვს გავლილი“.

რენალტ დივალიც ჰოლანდიიდანაა, მას 1935 წლის „ლაგონდა“ ჰყავს: „ეს არის ძველი ინგლისური მანქანა. ის ერთ–ერთი ცნობილი მანქანების რალისთვის შექმნეს, ეს იყო რალი პარიზიდან მონტეკარლომდე“.

ავტომობილების ძირითადი ნაწილი მეორე მსოფლიო ომამდელი წარმოებისაა. ყველაზე ძველი მანქანა - Vauxhall 30/98 1922 წელს არის გამოშვებული, ხოლო უახლესი - Jaguar Mark V Dropead Coupe - 1951 წელს.

ცხრა ქვეყნის 60–მდე წარმომადგენელი 14 ოქტომბრამდე საქართველოს თითქმის ყველა კუთხეს მოივლის. რალის დასასრულს სამი საუკეთესო მონაწილე გამოვლინდება.









[მარიამ ბარძიმაძე, ახალციხე]