ადგილობრივები: შსს–მ 200 ჩამორთმეული მანქანიდან მხოლოდ 5 დააბრუნა

შინაგან საქმეთა სამინისტროში ამბობენ, რომ გასულ წელს, ბორჯომსა და ადიგენში ხე–ბუჩქნარის უკანონოდ გადატანისას ჩამორთმეული მანქანების ნაწილი მესაკუთრეებს უკვე დაუბრუნეს, თუმცა, ჩამორთმეული 200–მდე მანქანიდან რამდენიაა ასეთი არ აკონკრეტებენ: „როგორც კი საგამოძიებო მოქმედებები დასრულდება მანქანას ყველას დავუბრუნებთ. ძიება ჯერ ისევ მიმდინარებს და ჯერ პასუხისგებაში არავინ მიგვიცია“.
ადგილობრივები აცხადებენ, რომ საგამოძიებო პროცესი დროში ჭიანურდება.

„ერთ ადიგენელს სამი მანქანა ჰყავდა და მისცეს, ასევე, ორ ადიგენელსაც თითო–თითო დაუბრუნეს. მაგის მეტი მანქანა არც ადიგენში და არც ბორჯომში არავისთვის დაუბრუნებიათ, ყოველდღე ველოდებით რაიმე სიახლეს“, – ამბობს ბორჯომში მცხოვრები გიორგი ბარამიძე.

იგივე განაცხადეს „სამხრეთის კარიბჭესთან“ სატელეფონო საუბარში სხვა ჩამორთმეული მანქანების მესაკუთრეებმაც: „სამი მანქანა მიყენია საჯარიმოზე, ვნახულობ–ხოლმე და დამპალია თითქმის სამივე. ჯერ იქიდან მარტო ხუთი მანქანა გაუშვეს“, – გვეუბნება ანზორ დარბაიძე.

ახალციხეში, საჯარიმო ავტოსადგომზე, მერქნით დატვირთული ისევ ათობით მანქანა დგას. მძღოლების თქმით, მანქანების დაბრუნებაზე პროკურატურიდან თუ სამხარეო ადმინისტრაციიდან არაერთი დაპირება მიირეს თუმცა, ამ დრომდე არაფერი შეცვლილა: „ესე გაგრძელება აღარ შეიძლება, დაგვიბარეს რამდენჯერმე პროკურატურაში და გვითხრეს, რომ მოგვცემდნენ, მაგრამ ისევ ისეა ყველაფერი. 5 ოქტომბრისთვის ისევ ვაპირებთ შეკრებას და აქციის გამართვას, სხვა გზა არ მაქვს“.

შეგახსენებთ, რომ მიმდინარე წლის დასაწყისში, ჩამორთმეული მანქანების მეპატრონეებმა, ტრანსპორტის დაბრუნების მოთხოვნით, არაერთი საპროტესტო აქცია გამართეს, როგორც სამხარეო ადმინისტრაციასთან ასევე, საოლქო პროკურატურასთან და სამხარეო სამმართველოსთანაც.



[ლუბა გიორგაძე, ახალციხე]