ახალციხეში ქუჩების მოსარეცხად მხოლოდ ერთი, ძველი მანქანა აქვთ

ახალციხეში შპს „კეთილმოწყობამ“ საგაზაფხულო სამუშაოები, დაახლოებით, 30 წლის წინ შეძენილი „ზილის“ მარკის სპეციალური წყლის მანქანით განაახლა. მანქანა, 1989 წელს, მაშინდელმა მმართველობამ, იყიდა. ის ერთ ჯერზე ექვს ტონა წყალს იტევს და ხუთამდე ქუჩის შემოვლას წვდება.

კეთილმოწყობის სამსახურის თანამშრომლები ამბობენ, რომ მანქანა მწყობრიდან ხშირად გამოდის და მის შეკეთებას დიდი დრო სჭრიდება: „ჩემი მუშაობის დროსაც გაფუჭდა და ველოდეთ როდის გააკეთებდნენ, სხვა გზა არ გვქონდა. მანქანა ძალიან ძველია და ნაწილ–ნაწილ ვრწყავდით ქუჩებს ამის გამო “, – ამბობს შპს „კეთილმოწყობის“ ყოფილი დირექტორი გიორგი ლონდარიძე.

მოძველებული მანქანის გამო, რომ ყველა ქუჩის მორეცხვა ვერ ხერხდება, ამაზე „კეთილმოწყობის“ ახლადდანიშნული დირექტორი კობა კურტანიძეც საუბრობს: „არავინ იცის მწყობრიდან როდის გამოვა, ამიტომ მორეცხვის პროცესი ეტაპობრივად ხორციელდება“.

ახალციხის მუნიციპალიტეტის მერიაში ამბობენ, რომ „კეთილმოწყობისთვის“ მანქანის შეძენას არ გეგმავენ:"მიმდინარე წელს "კეთილმოწყობისთვის" რაიმეს შეძენა გათვალისწინებული არ გვაქვს".

შპს „კეთილმოწყობისთვის“ მიმდინარე წელს 810 184 ლარია გამოყოფილი. ამ თანხაში შედის გაზაფხულზე ნაზამთრალი ქუჩების გარეცხვა და სხვადასხვა პერიოდში დანამვაც.

[ლუბა გიორგაძე, ახალციხე]