რაბათში კლასიკური მანქანების ავტორბოლა გაიმართება

კლასიკური ავტომანქანებით მრბოლელები, 30 მაისს, 15:00 საათზე „ახალციხის ციხის“ ზედა ნაწილის პარკინგზე შემოვლენ.

რბოლაში ათამდე რარიტეტული საკოლექციო მანქანა მიიღებს მონაწილეობას, რომელთა საშუალო ფასი მილიონი დოლარიდან იწყება. მათ შორისაა მეორე მსოფლიო ომამდე პერიოდის ავტომობილები და ყველაზე ახალი 1954 წლის „პორშე“ და „იაგუარი“.

რბოლა, 27 მაისს, ევროპის მოედნიდან, დილის 11:00 საათზე დაიწყება და პირველ ივნისს თბილისშივე დასრულდება.

ღონისძიების მონაწილეები მოივლიან კახეთისა და სამცხე-ჯავახეთის ისტორიულ ქალაქებსა და სოფლებს, ასევე, გაეცნობიან ქართულ ტრადიციულ არქიტექტურას.

რბოლის მარშრუტი საქართველოს ეროვნული საავტომობილო ფედერაციისა GAF და Transport Security Consultants (ტრანსპორტის უსაფრთხოების და ტრეინინგების კომპანია) მხარდაჭერით დაიგეგმა. გარბენის მანძილი დაახლოებით 700 კილომეტრია.

კლასიკური ავტომობილების ავტორბოლა საქართველოში პირველად გაიმართება. ღონისძიება ცნობილი ავტომრბოლელი ქალის, ზოი ვითაკერის ინიციატივით დაიგეგმა.

მსოფლიოში ცნობილმა ავტომრბოლელმა, ზოი ვითაკერმა რამდენიმე წელი იმუშავა „ფორმულა 1“- ში. იგი მართავდა ისეთ მანქანებს, როგორიცაა - კლასიკად ქცეული 1957 D-type jaguar და 1996 corvette Stingray, ასევე თანამედროვე Porsche GT4 და Lamborgini Aventador.
თავგადასავალების მოყვარული პროფესიონალის მიზანი კლასიკური „პორშეს“ საქართველოში ჩამოტანაა.

[sknews.ge]