ახალციხეში კლასიკური მანქანების ავტორბოლა მოეწყო [Video]

კლასიკურმა მანქანებმა სტარტი 27 მაისს, თბილისში ევროპის მოედნიდან აიღეს. მათ უკვე შემოიარეს კახეთი და დღეს, 30 მაისს კი ახალციხეს ესტუმრნენ.

რბოლაში მონაწილე შვიდი საკოლექციო მანქანიდან ნაწილი მეორე მსოფლიო ომამდელი პერიოდის იყო. მათი ფასი საშუალოდ მილიონი დოლარიდან იწყება.

დღეს, ახალციხეში არ ჩამოუყვანიათ, 1954 წლის ყველაზე ახალი „პორშე“ და „იაგუარი.“

ავტორბოლაში მონაწილე მანქანები „ახალციხის ციხის“ ზედა პარკინგზე 15:00 საათზე გამოჩნდნენ.



„ორი დღე გავჩერდით კახეთში, ორი სამცხე–ჯავახეთში და ვფიქრობთ, რომ მსაგვსი ღონისძიება მომავალ წლებშიც ჩავატაროთ“, – ამბობს ღონისძიების ორგანიზატორი და ბრიტანულ–ქართული სავაჭრო პალატის დირექტორი მაკო აბაშიძე.

კლასიკური მანქანების ავტორბოლა საქართველოში პირველად იმართება. ღონისძიება ცნობილი ავტომრბოლელი ქალის ზოი ვითაკერის ინიციატივით დაიგეგმა.

„ჩვენ გვინდოდა საქართველოსთვის გვეჩევენებინა მეორე მსოფლიო ომამდე პერიოდის მანქანები, ასევე, გვენახა ადგილობრივი საკოლექციო მანქანები და დაგვეთვალიერებინა საქართველოს ღირსშესანიშნაობები, ამიტომ ეს რბოლა ჩემთვის ძალიან მნიშვნელოვანია“,– ამბობს ზოი ვითაკერი.

ღონისძიების ფარგლებში ავტორბოლის მონაწილეები ჯამში 900 კილომეტრს გაივლიან. მათ პირველ ივნისამდე უნდა მოიარონ საქართველოს უძველესი ქალაქები და გაეცნონ მათ ისტორიულ არქიტექტურას.

კლასიკური მანქანების ავტორბოლა პირველ ივნისს ისევ თბილისში დასრულდება.როგორც ღონისძიების ორგანიზატორები ამბობენ, რბოლა საქართველოს დამოუკიდებლობის 100 წლისთავს ეძღვნება.

რბოლის მარშრუტი საქართველოს ეროვნული საავტომობილო ფედერაციისა GAF და Transport Security Consultants (ტრანსპორტის უსაფრთხოების და ტრეინინგების კომპანია) მხარდაჭერით დაიგეგმა.

ღონისძიებასთან დაკავშირებით საქართველოს დიდი ბრიტანეთიდან, უკრაინიდან, ყაზახეთიდან და რუსეთიდან 11 ჟურნალისტი ეწვია. ჟურნალისტების ჯგუფი საქართველოში ტურიზმის სააგენტოს მხარდაჭერით ჩამოვიდა.



[ლუბა გიორგაძე, ოთარ აწყურელი ახალციხე]