დავით ბაქრაძის ვიზიტი მესხეთში

ამის შესახებ საქართველოს პარლამენტის თავმჯდომარემ დავით ბაქრაძემ დღეს, სამცხე-ჯავახეთში ვიზიტისას განაცხადა.

მესხეთში ვიზიტი პარლამენტის თავმჯდომარემ ადიგენიდან დაიწყო. იგი გედენიძეების შვიდსულიანი ოჯხს ესტუმრა და ოჯახის ორი წევრი ადიგენის საავადმყოფოში გამოკვლევების ჩასატარებლად წაიყვანა.

ადიგენის საავადმყოფოში სტუმრობისას ბაქრაძემ ჯანდაცვის ხელმისაწვდომობაზე გაამახვილა ყურადღება.

”საქართველოში ყოველი მეორე ადამიანი დაეზღვევა, მაგრამ ეს მხოლოდ პროცესის დასაწყისი იქნება, ჩვენი ამოცანაა ყველა ადამიანი იყოს დაზღვეული და ყველა ოჯახს ქონდეს ჯანდაცვის და მკურნალობის საშუალება”,- განაცხადა პარლამენტის თავმჯდომარემ.

მისი შეფასებით, მნიშვნელოვანია არა მხოლოდ ის, რომ სახელმწიფო ადამიანებს აზღვევს, არამედ ისიც, რომ მზღვეველებმა დაზღვევის პაკეტებით სრულფასოვნად ისარგებლონ.

ადიგენის შემდეგ დავით ბაქრაძე ახალციხის სახელმწიფო სასწავლო უნივერსიტეტის სტუდენტებს შეხვდა და მიმდინარე რეფორმებსა და სტუდენტურ დაზღვევაზე ესაუბრა.

მისი განცხადებით, მიმდინარე წლის სექტემბერში სახელმწიფო ორ მილიონზე მეტ ადამიანს დააზღვევს, მათ შორის სტუდენტების დაზღვევაც იგეგმება.

შეხვედრის დასრულების შემდეგ დავით ბაქრაძემ რაბათში მიმდინარე სარეაბილიტაციო სამუშაოები დაათვალიერა.

”ძალიან შთამბეჭდავია ყველა ის სამუშაო, რომელიც აქ მიმდინარეობს. სამუშაოების დასრულების შემდეგ ახალციხე დაიბრუნებს რეგიონული კვანძის ფუნქციას. აქ ჩამოვა ძალიან ბევრი ტურისტი, ვინაიდან ეს იქნება ხელახალი აღმოჩენა ამ დრომდე მივიწყებული ულამაზესი კუთხისა”, -განაცხადა ბაქრაძემ.

პარლამენტის თავმჯდომარის თქმით, ინფრასტრუქტურული პროექტების მიზანია ’’ერთი მხრივ გაალამაზოს ქვეყანა და შექმნას უფრო კომფორტული პირობები ცხოვრებისათვის და მეორე მხრივ, შეიქმნას დამატებითი სამუშაო ადგილები, რაც ემსახურება მოსახლეობის ძირითადი პრობლემის მოგვარებას”.

[თიკო ზაზაძე, ახალციხე]