ბაქრაძის დაპირებები ნინოწმინდელებს

დღეს საქართველოს პარლამენტის სპიკერი დავით ბაქრაძე ნინოწმინდის მუნიციპალიტეტს ესტუმრა.

ვიზიტის მიმდინარეობისას პარლამენტის სპიკერი სამცხე-ჯავახეთის გუბერნატორთან ლაშა ჭკადუასთან, ახალქალაქისა და ნინოწმინდის მაჟორიტარ დეპუტატებთან და რამდენიმე სხვა ჩინოსანთან ერთად სოფლებს ფოკასა და სათხას ეწვია და ქალაქ ნინოწმინდაში მოსახლეობას შეხვდა.

პარლამენტის სპიკერი ფოკის მონასტერში ღვთისმსახურებას დაესწრო. შემდეგ სოფელ სათხაში გაემგზავრა, სადაც ყოველწლიურ ზეიმში “სათხას დღე” მიიღო მონაწილეობა. ვიზიტის ბოლოს ბაქრაძე ახალგაზრდობის სახლის შენობასთან ნინოწმინდის მოსახლეობას შეხვდა, სადაც მან მოსახლეობის პრობლემებსა და
რეგიონში მიმდინარე პროგრამებზე ისაუბრა.

პარლამენტის სპიკერმა განაცხადა, რომ იგი ხშირად სტუმრობს ნინოწმინდის მუნიციპალიტეტს. ეს ფაქტი კი მაჟორიტარი დეპუტატების აქტიურობითა და მხარისადმი სიყვარულით დაასაბუთა.

პრიორიტეტებთან დაკავშირებით ბაქრაძემ აღნიშნა, რომ სახელმწიფო ცდილობს, რაც შეიძლება მეტი ახალგაზრდა წავიდეს თბილისში სასწავლებლად.

სახელმწიფოს მიღწევებს შორის დავით ბაქრაძემ რეგიონში წყლისა და გაზმომარაგების საკითხების მოგვარების პროცესი დაასახელა. ისაუბრა პენსიის მოსალოდნელ მომატებასა და მოსახლეობის სამედიცინო დაზღვევაზე.

საქართველოს პარლამენტის სპიკერი მოსახლეობას დაჰპირდა, რომ მომავალ წელს დაიწყება სკოლების რეაბილიტაციის პროგრამა, რის შედეგადაც ყველა სკოლას კარგი პირობები ექნება.

დავით ბაქრაძემ სოფლის მეურნეობის მხარდაჭერის საქმეში გაწეულ ძალისხმევაზეც ისაუბრა. მისი თქმით, საქართველოში 12 სასოფლო-სამეურნეო ცენტრი იქმნება, რომლებიც ტექნიკით იქნება აღჭურვილი. გაზაფხულზე ქვეყანამ 400 ტრაქტორი შეიძინა, შემოდგომაზე კიდევ 500 ერთეულის, ხოლო მომდევნო წლის გაზაფხულზე 500 ტრაქტორის ყიდვას გეგმავს.

[აღუნიკ აივაზიანი, ახალქალაქი]