რძის წარმოების განვითარებისთვის ახალციხეში ფერმერებთან შეხვედრები იმართება

ახალციხელ ფერმერებს, ასოციაციის ორგანიზებით, სურსათის უვნებლობის, კოოპერატივების განვითარების სააგენტოს, საკონსულტაციო სამსახურების და სხვა სახელმწიფო უწყებების წარმომადგენლები ხვდებიან.

„ვსაუბრობთ ისეთ საკითხებზე, რომლებიც აწუხებთ ფერმერებს საქონლის მერძევეობის განვითარების კუთხით. ვცდილობთ გავერკვეთ რა სირთულეებს ხვდებიან ამ მიმართულებით ფერმერები და დავეხმაროთ მათ გადაჭრაში“, – ამბობს ქართულ-ფრანგული პროექტის „კავკასიური რძის“ ხელმძღვანელი ზურაბ ყულჯანიშვილი.

შეხვედრებზე ფერმერებს ნებისმიერ საკითხზე პასუხების მიღება, როგორც სახელმწიფო უწყებების, ასევე, კერძო სექტორის წარმომადგენლებისგან შეუძლიათ.

„5 ძროხა მყავს, სოფელ რუსთავში ვცხოვრობ. მინდა, რომ მომავალში გავზარდო ჩემი ფერმა და ეს შეხვედრა ბევრი საკითხის დაგეგმვაში დამეხმარება“, – ამბობს ფერმერი თამაზ შავაძე.

ვეტერინარულ პრობლემებზე აკეთებს აქცენტს ფერმერი სოფო ზაზაშვილი: „ჯანსაღი რძის წარმოება, როცა საქონელს რაიმე მედიკამენტის გაკეთბა სჭირდება, განსაკუთრებით მნიშვნელოვანია. ბევრ ასეთ საკითხზე მივიღეთ დღეს პასუხი. ორი ძროხა მყავს. ბერი დეტალია რაზეც რძის წარმოების დროს ყურადღება უნდა გავამახვილოთ".

პროექტს, რომლის ფარგლებშიც შეხვედრა გაიმართა, ფერმერთა ასოციაცია „ერთობა“ და GBDC FERT-ი ერთობლივი პროექტის „კავკასიური რძის“ ფარგლებში ახორციელებენ. მიზანი, სამცხე–ჯავახეთში მერძევეობის განვთარების ხელშეწყობაა.

[თორნიკე ზაზაძე, ახალციხე]