საატესტატო გამოცდები განახლდა

დილის ცხრა საათიდან საქართველოს ყველა სკოლაში მეთორმეტე კლასის მოსწავლეები ქიმიის გამოცდას აბარებენ. საბუნებისმეტყველო საგნების ჩაბარება თითქმის ყველა კურსდამთავრებულს ეძნელება.

ახალციხის მეორე საჯარო სკოლის 55 მეთორმეტეკლასელიდან 21 რუსულ სექტორზე სწავლობს. დღევანდელ გამოცდაზე ამ დრომდე არცერთი ბავშვი არ ჩაჭრილა. სკოლის დირექტორის მარინა ზედგინიძის თქმით, ის ნაკადი, რომელიც გამოცდაზე პირველი შედის შედარებით სუსტი მოსწავლეები არიან, ამიტომ იმედი აქვთ, რომ შემდეგი ნაკადი უკეთეს შედეგებს აჩვენებს.

”ყველაზე მეტად 12 საათამდე გამოსული ბავშვების შედეგების გვეშინია. მეორე ნაკადზე უკეთესი მოსწავლეები არიან, თან კითხვები გამოაქვთ და შემდეგმა ნაკადმა უკვე იცის დაახლოებით რა სირთულის გამოცდა იქნება და აღარ ნერვიულობენ”, - ამბობს მარინა ზედგინიძე.

ახალციხის მესამე საჯარო სკოლის ორმა მოსწავლემ ქიმიის გამოცდაზე მინიმალური კომპეტენციის ზღვარი ვერ გადალახა. ისინი, ვინც რომელიმე გამოცდაზე ჩაიჭრებიან იგივე საგანს მეორე წელს განმეორებით ჩააბარებენ.

სკოლებში ამბობენ, რომ მოსწავლეებს ყველაზე მეტად ფიზიკის გამოცდის ჩაბარება გაუჭირდათ. მეორე საჯარო სკოლიდან ფიზიკა რვა მოსწავლემ ვერ ჩააბარა. ახალციხის მესამე საჯარო სკოლაში კი ამ გამოცდაზე ბარიერი ათმა მოსწავლემ ვერ გადალახა.

არაქართულენოვან სკოლებში ამბობენ, რომ ფიზიკის გამოცდაზე კითხვები კარგად ნათრგმნი არ იყო. ამიტომ მოსწავლეები კითხვებს ზუსტად ვერ იგებდნენ.

”მე ველაპარაკე არაქართულენოვანი სკოლების დირექტორებს და თითქმის ყველა აღნიშნავს, რომ თანრგმანი არ იყო კარგი. ჩვენი მოსწავლეები, ვინც რუსულ სექტორზე სწავლობს, ამბობდნენ, რომ ზოგიერთი კითხვა საეთოდ ვერ გაიგეს”, - ამბობს მეორე საჯარო სკოლის დირექტორი.

იგივეს ამბობს, მესამე სომხური სკოლის დიქრეტორი სვეტა არუთუნიანიც: ”ზოგიერთი ისეთი ამოცანა იყო, რომ მოსწავლეებმა ვერაფერი ვერ გაიგეს. დანარჩენ გამოცდებში ნორმალური შედეგები აჩვენეს, თუმცა იყო შემთხვევა, როცა ბავშვმა 5,48 ქულა მიიღო, 0,02 ქულა დააკლდა და ამის გამო ატესტატს ვერ იღებს”.

[თამარ თოთაძე, ახალციხე]