საატესტატო გამოცდები - დღე მესამე

რიგით მესამე საატესტატო გამოცდა მოსწავლეებს დღეს ისტორიაში აქვთ. გამოცდა, ტრადიციულად, ყველა საჯარო სკოლაში დილის 9 საათზე დაიწყო.

ახალციხის მეორე სკოლაში, სადაც ორი - რუსული და ქართული განყოფილებაა, საატესტატო გამოცდებს 55 მოსწავლე აბარებს. ამათგან, 18 რუსული სექტორიდანაა.

სკოლის დირექტორის მარინა ზედგინიძის თქმით, გამოცდები შეფერხებების გარეშე მიმდინარეობს.

საგამოცდო ოთახში ორი ვიდეოთვალი და 14 კომპიუტერია დამონტაჟებული. გამოცდაზე შვიდ-შვიდი მოსწავლე შედის.

თითოეული ჯგუფისთვის საათნახევარია განკუთვნილი, მაგრამ, მოსწავლეების უმეტესობა ტესტს 25 წუთის განავლობაში ავსებს.

თამარ მღებრიშვილი ოქროს მედალოსანია. წინა ორი გამოცდისგან განსხვავებით, ისტორიის გამოცდის შედეგით უკმაყოფილოა: ”ცხრა ქულა მივიღე . თანამედროვე ეპოქა იყო რთული. უფრო მეტიც შემელო. ძალიან ვნერვიულობდი და ამან ჩემს ქულებზეც იმოქმედა”.

6,68 ქულა მიიღო დათო სანდროშვილმა. შედარებით დაბალი ქულა აქვს იანა ნანოიანს: ”6,13 მივღე. შედეგით კმაყოფილი ვარ. მთავარია, ლოგიკურად იმსჯელონ და ყველა გადალახავს ბარიერს”.

6,3 ქულა დააგროვა მაია ტაბატაძემ: ”ძალიან მიჭირს თარიღების დამახსოვრება და ამის გამო ვნერვიულობდი”.

თანაკლასელების თქმით, რამდენიმე მოსწავლემ ბარიერის გადალახვა ვერ შეძლო.

მოსწავლეების ქულებით კმაყოფილია როგორც ქართული, ასევე რუსული სექტორის ისტორიის მასწავლებელი.

”ჩემი კლასიდან ერთმა ვერ დააგროვა საკმარისი ქულები, ვინც სწავლობდა, არ გასჭირვებია”, - ამბობს რუსული სექტორის ისტორიის მასწავლებელი ასია ჩახოიანი.

’’ისტორია ზღვა მასალაა, ქრონოლოგიურად დალაგება, პარალელის გავლება უჭირთ”, - ამბობს ქართული განყოფილების ისტორიის მასწავლებელი ხათუნა მიქელაძე.

მეორე სკოლის დირექტორი მარინა ზედგინიძე გამოცდების შედეგებით კმაყოფილია, - ”ქართულის გამოცდა ყველა მოსწავლემ ჩააბარა. ჯამში, 11 ათიანი დაიწერა. მხოლოდ ორმა ბავშვმა ვერ გადალახა მინიმალური ზღვარი უცხო ენაში.
ყველაზე მეტად საბუნებისმეტყველო საგნების გვეშინია, რადგან ბავშვებს თითოეული საგნის შესწავლა თითო სემესტრში მოუწიათ’’.

ხვალ მეთორმეტეკლასელები გამოცდას გეოგრაფიაში ჩააბარებენ.

[თიკო ზაზაძე, ახალციხე]