‘თუ სახელმწიფო არ დაეხმარა, ფერმერი ვერ გაძლიერდება’ – ახალციხეში ფორუმი იმართება

„ძლიერი ფერმერი, ძლიერი ქვეყნისთვის“, – ამ სახელწოდებით ახალციხეში ფორუმი ფერმერთა ასოციაცია „ერთობის“ ორგანიზებით მოეწყო. „ერთობას“ საქართველოს ბიზნესის განვითარების ცენტრ კავკასიის ახალციხის ოფისი (GBDC AO), საფრანგეთის საელჩო და ფრანგული ასოციაცია FERT დაეხმარნენ.

„დღევანდელი შეხვედრა არის ცოდნისა და გამოცდილების გაზიარება სხვა ფერმერებისთვის. ასევე, სამთავრობო და არასამთავრობო სექტორის წარმომადგენლებმა თავიანთი პროგრამები წარადგინეს“, – ამბობს GBDC პროგრამის პროექტის ხელმძღვანელი ზურაბ ყულჯანიშვილი.

სამცხე–ჯავახეთის ფერმერთა ასოციაცია „ერთობა“ 2015 წელს ჩამოყალიბდა. მასში რეგიონის ხუთი სოფლიდან ათი ფერმერია გაერთიანებული. ასოციაციის მიზანია დაეხმაროს იმ ფერმერებს, ვისაც ფერმერული მეურნეობის განვითარება სურს.

„გვინდა, რომ ჩვენი მეურნეობა გავაფართოვოთ, ახალი ტექნოლოგიები დავნერგოთ, განვავითაროთ, ერთმანეთს ვუზიარებთ ჩვენს გამოცდილებებს. ფერმერებს მოვუწოდებ, გაერთიანდნენ, ერთობლივად უფრო მეტი საქმე შეიძლება გაკეთდეს“, – ამბობს ასოციაცია „ერთობას“ დამფუძნებელი წევრი ჯემალ იაკობაძე.

ახალციხის მუნიციპალიტეტის სოფელ მინაძეში მცხოვრები ფერმერი გიორგი გედევანიძე იმ პრობლემებზე საუბრობს, რომელიც ყოველდღიურ საქმიანობაში ხვდება: „გასაღების ბაზარი არ არსებობს, ბორჯომი ღირს ერთი ლიტრი 1,20 ლარი და რძე ღირს 50–60 თეთრი, ბაზარზე ყველი ღირს 3 ლარი, გლეხი მოგებას ვეღარ ნახულობს, თივას დამზადება უნდა, მოვლა და პატრონობა უნდა საქონელს, გლეხს აღარაფერი რჩება. თუ სახელმწიფო არ დაეხმარა, ფერმერი ვერ გაძლიერდება“.

სოფლის მეურნეობის და სურსათის დეპარტამენტის უფროსის კონსტანტინე კუცაიძის თქმით, კარგია, რომ ფერმერებმა დაიწყეს გაერთიანება.

„ის, რასაც ვერ გააკეთებს ერთი ადამიანი, ყველა ერთობლივად აკეთებს და ეს არის კარგი გამოცდილება, რომელიც დასავლეთ ევროპაში და მოწინავე ქვეყნებში არსებობს. მოხარული ვარ იმ ენთუზიაზმით, იმ შრომისმოყვარეობით და იმ დამოკიდებულებით საქმისადმი, რაც ამ ხალხს შეუძლია“, – განაცხადა კონსტანტინე კუცაიძემ და აღნიშნა, რომ სამინისტრო მაქსიმალურად დაუჭერს მხარს ფერმერებს და გაერთიანებებს.



[თამარ თოთაძე, ახალციხე]