ნიკა მელია ოლქებში სხდომების დატოვებაზე: 'ეს იყო საპროტესტო ნაბიჯი, რომელიც ჩვენ გადავდგით'

გუშინ, 11 სექტემბერს სამცხე–ჯავახეთის ექვსი ოლქიდან ხუთში, საუბნო საარჩევნო კომისიის წევრების არჩევნები, ოპოზიციური პარტიის დამკვირვებლებმა და საოლქო საარჩევნო კომისიის წევრებმა, პროტესტის ნიშნად დატოვეს. ნიკა მელიას განმარტებით, "ოცნება" ცდილობს რაც შეიძლება მეტი ახლობელი დანიშნოს საოლქო საარჩევნო კომისიებში.

"ეს იყო საპროტესტო ნაბიჯი, რომელიც ჩვენ გადავდგით, მაგრამ ეს ყველაფერი ნამდვილად ვერ უშველის „ქართულ ოცნებას“ და არ იქნება საკმარისი იმისთვის, რომ ქვეყანას თავზე დაასვას პუტინის ხელდასმით გამოგონილი სალომე ზურაბიშვილი, რომელიც საკუთარ ქვეყანას ადანაშაულებს ომის წარმოებაში", – აცხადებს ნიკა მელია.

მისი თქმით, ოლქებში არჩევნების ჩატარებამდე გაერთიანებული ოპოზიციის ლიდერმა გრიგოლ ვაშაძემ არაერთი ბრიფინგი გამართა, სადაც კონკრეტული ფაქტებით საზოგადოებას გააცნეს ის პირები, რომლის დანიშვნასაც "ოცნება" გეგმავდა: "ოჯახის წევრებს ნიშნავენ იმ გამოყოფილ კვოტებზე, სადაც კანონის თანახმად უნდა იყოს პოლიტიკურად ნეიტრალური ადამიანი დანიშნული".

იგი იმედოვნებს, რომ მიუხედავად მცდელობისა არჩევნებს ვერ გააყალბებენ: "ოცნება" გაყალბებისთვის ემზადება და სამცხე–ჯავახეთში ერთი ადამიანი მაინც არსებობს, ვინც სხვაგვარად ფიქრობს?! გაერთიანებული ოპოზიციაში შემავალ პარტიებს ეყოლებათ არჩევნებზე ძალიან სანდო დაკმკვირვებლები და კომისიის წევრები იმისთვის, რომ არ ჩაადენინოს დანაშაულებრივი ქმედება "ქართული ოცნების" კომისიის წევრებს".

შეგახსენებთ, რომ საუბნო საარჩევნო კომისიის წევრების არჩევნები სამცხე–ჯავახეთში 11 სექტემბერს ჩატარდა.

[თინათინ ზაზაძე, ახალციხე]