ახალციხის საკრებულოში გელა დემეტრაძეს ეკა ტატალაშვილი ჩაანაცვლებს

N37 ახალციხის საოლქო საარჩევნო კომისიამ ახალციხის მუნიციპალიტეტის საკრებულოს უკვე მიმართა. ამიტომ ახალი წევრის საკრებულოში შესვლას უახლოეს სხდომაზე დეპუტატები ცნობად მიიღებენ. სავარაუდოდ, ამავე სხდომაზევე შეიქმნება ახალი ფრაქცია „ევროპული საქართველო“, რომელიც გელა დემეტრაძის უფლებამოსილების შეწყვეტის შემდეგ ავტომატურად გაუქმდა. მიზეზი ის იყო, რომ ფრაქციაში სამ წევრზე ნაკლები დარჩა.

„თუ შესაბამისი დოკუმენტები მომზადებული ექნებათ შეუძლიათ, რომ ფრაქცია უახლოს სხდომაზე დაარეგსტრირონ, შეზღუდულები არ არიან“, – ამბობს ახალციხის მუნიციპალიტეტის საკრებულოს თავმჯდომარე გელა ნოზაძე.

„ევროპული საქართველოს“ ახალციხის რაიონული ორგანიზაციის თავმჯდომარის გელა დემეტრაძის თქმით, ფრაქციის ხელახლა დარეგისტრირების შემდეგ თავმჯდომარე ირინა გელაშვილი გახდება, მისი მოადგილე ეკა ტატალაშვილი იქნება, რიგითი წევრი კი ემანუელ პოზოიანი.

ახალციხის საკრებულოში მომავალი სხდომა ჯერ დანიშნული არ არის.

ეკა ტატალაშვილი 2000–2017 წლებში ახალციხის მუნიციპალიტეტის მერიასა და საკრებულოში სხვადასხვა პოზიცაიზე მუშაობდა.

ახალციხის მუნიციპალიტეტის საკრებულომ უკვე ყოფილ დეპუტატს გელა დემეტრაძეს ვადამდე ადრე უფლებამოსილება შეუწყვიტა. მიზეზი ავარიის გამო სასამართლოს გამამტყუნებელი განაჩენია. საქმე ეხება 15 აპრილს ახალციხე–აბასთუმნის გზაზე მომხდარ ავარიას, რომლის შედეგადაც სამი პირი დაშავდა და ერთი გარდაიცვალა.

დემეტრაძეს სამი წლით პირობითი მსჯავრი შეეფარდა და 5 000 ლარიანი ჯარიმა დაეკისრა. ასევე, ერთი წლით ავტომანქანის მართვა აეკრძალა. სასამართლომ გადაწყვეტილება მიმდინარე წლის 20 ივლისს მიიღო.

[ლუბა გიორგაძე, ახალციხე]