გელა დემეტრაძეს ახალციხის საკრებულომ უფლებამოსილება შეუწყვიტა

გელა დემეტრაძისათვის, როგორც საკრებულოს წევრისთვის ვადამდე უფლებამოსილების შეწყვეტას ცნობად, ახალციხის საკრებულო ხვალ, 24 აგვისტოს გამართულ სხდომაზე მიიღებს. მიზეზი, ახალციხის რაიონული სასამართლოს მიერ გამოტანილი გამამტყუნებელი განაჩენი გახდა.

საქმე ეხება, 15 აპრილს მომხდარ ავტოსაგზაო შემთხვევას. ამ დროს მანქანას გელა დემეტრაძე მართავდა.შსს ინფორმაციით, მძღოლმა საჭე ვერ დაიმორჩილა და გზის სავალი ნაწილიდან გადავიდა. შემთხვევის შედეგად სამი პირი დაშავდა, ერთი კი გარდაიცვალა.

ახალციხის რაიონულმა სასამართლომ გამამტყუნებლი განაჩენი 20 ივლისს გამოიტანა. გელა დემეტრაძეს სამი წლით პირობითი მსჯავრი შეეფარდა, 5 000 ლარიანი ჯარიმა დააკისრა და ერთი წლით ავტომანქანის მართვა აეკრძალა.

სასამართლო გადაწყვეტილება საკრებულოს 15 აგვისტოს ეცნობა. თავმჯდომარის გელა ნოზაძის განმარტებით, იმის გამო, რომ გადაწყვეტილების ზემდგომ ინსტანციებში გასაჩივრების ვადა უკვე გასულია, საკითხზე იურიდიულმა კომისიამ იმსჯელა და თვითმმართველობის კოდექსის მიხედვით, დემეტრაძეს ვადამდე უფლებამოსილება შეუწყვიტა.

„ამ საკითხს საკრებულოს სხდომაზე ცნობად მივიღებთ და საარჩევნო კომისიას ვაცნობებთ, რომ პარტიული სიის მიხედვით დეპუტატი ახალმა წევრმა ჩაანაცვლოს“, – განმარტავს საკრებულოს თავმჯდომარე.

დემეტრაძეს უფლებამოსილება, თვითმმართველობის კოდექსის 43–მე მუხლის პირველი ნაწილის „ბ“ ქვეპუნქტის გათავლისწინებით შეუწყდა, რომელის მიხედვითაც –„ დეპუტატის მიმართ კანონიერ ძალაში შევიდა საბოლოო ინსტანციის სასამართლოს გამამტყუნებელი განაჩენი ან გავიდა კანონიერ ძალაში შესული სასამართლოს გამამტყუნებელი განაჩენის ზემდგომი ინსტანციის სასამართლოში გასაჩივრების ვადა“.

როგორც გელა დემეტრაძე განმარტავს, მას საკრებულოში სავარაუდოდ პარტიული სიის მეოთხე ნომერი ეკა ტატალაშვილი ჩაანაცვლებს –„თუმცა ჯერ ყველაფერი დაზუსტებული არ არის. ალბათ ორ კვირაში გაირკვევა ვინ შევა ჩემს მაგივრად საკრებულოში“.

საკრებულოში დეპუტატის უფლებამოსილების შეწყვეტის შემდეგ, დაიშალა ფრაქცია "ევროპული საქართველოც", რადგან წარმომადგენლობით ორგანოში პარტიის სამ წევრზე ნაკლები დარჩა. საკრებულოს სხდომაზე ცნობად დეპუტატები ამ საკითხსაც მიიღებენ.

„ევროპულ საქართველოში“ ამბობენ, რომ მას შემდეგ, რაც საკრებულოში ახალი დეპუტატი შევა, ფრაქციაც შეიქმნება და ახალ თავმჯდომარესაც აირჩევენ.

ახალციხის საკრებულოში სხდომა ხვალ, 24 აგვისტოს 13:00 საათზეა ჩანიშნული.

[ლუბა გიორგაძე, ახალციხე]