ახალციხის საკრებულოში „ევროპული საქართველოს“ ფრაქცია გაუქმდა

ამის შესახებ ცნობილი დღეს, პირველ დეკემბერს გამართულ საკრებულოს სხდომაზე გახდა.

„განცხადებით შემოვიდა ვაჟა ჩიტაშვილი, მან დატოვა საკრებულოს წევრობის მანდატი. ამას მოჰყვა ცვლილება ფრაქციაში და მის წევრებს უფლებამოსილება შეუწყდათ. მათი უფლებამოსილების აღდგენა ვერ მოხდება მანამდე, ვიდრე პარტია საკრებულოში ჩიტაშვილს სხვა წევრით არ ჩაანაცვლებს", – განაცხადა საკრებულოს სხდომაზე ახალციხის საკრებულოს თავმჯდომარემ გელა ნოზაძემ.

ფრაქციას „ევროპული საქართველო მოძრაობა თავისუფლებისთვის“ გელა დემეტრაძე ხელმძღვანელობდა.

„პროცედურები ასეთია, საოლქომ უნდა მიანიჭოს საკრებულოს წევრობის უფლებამოსილება სიაში მომდევნო წევრს. რამდენ ხანს გაგრძელდება ეს პროცედურები არ ვიცი. როგორც კი ეს მოხდება ჩვენ მაშინვე შევიკრიბებით და ხელახლა შევქმნით ფრაქციას“, – ამბობს გელა დემეტრაძე.

მისივე თქმით, ვაჟა ჩიტაშვილს "ევროპული საქართველო" ემანუელ პოზოიანით ჩაანაცვლებს.

[თინათინ ზაზაძე, ახალციხე]