აწყურში ხიდის მშენებლობაზე 35 წლის კაცი გარდაიცვალა

გარდაცვლილი სენაკიდან იყო და იგი ბოლო სამი თვის განმავლობაში ხიდის მშენებლობაზე მუშაობდა.

მომხდარის შესახებ მშენებარე ობიექტზე დასაქმებულებს საუბარი არ სურთ: „უფროსობა მოვა და იმას დაელაპარაკეთ. გარდაცვლილი უკვე სენაკში გადაასვენეს და ჩვენც იქ მივდივართ“, – გვითხრეს მათ.

ხელმძღვანელი პირები ახალციხის რაიონულ სამმართველოში დაკითხვაზე იმყოფებიან. ადგილობრივები კი ყვებიან, რომ დენი იმ რკინის არმატურაზე, რომელსაც მუშები ქსოვდნენ, ელექტროსადენიდან გადავიდა: „ძალიან გრძელი არმატურა რკინიგზის ელექტროსადენზე დაუვარდა, რის გამოც დენმა დაარტყა და გარდაიცვალა. ამ ხაზებში 300 ვოლტი დენი გადის. ალბათ შემთხევით მოუვიდა“.

შინაგან საქმეთა სამინისტრომ მომხდარზე ძიება 240 მუხლის პირველი ნაწილით დაიწყო, რაც სამშენებლო სამუშოების წარმოებისას უსაფრთხოების ნორმების დარღვევას გულისხმობს.

სოფელ აწყურში ახალი ხიდის მშნებელობა სამ თვეზე მეტია მიმდინარეობს. სამუშაოებს „ჯორჯიან ბრიჯ ქონთრაქშენი“ ახორციელებს. მშენებლობა სახელმწიფო ბიუჯეტიდან ფინანსდება.



[მარიამ ბარძიმაძე, ახალციხე]