ახალ გუბერნატორს სამცხე–ჯავახეთში სოზარ სუბარი წარადგენს

როგორც, რეგიონული მართვის სამსახურში „სამხრეთის კარიბჭეს“ განუცხადეს, ბესიკ ამირანაშვილს სოზარ სუბარი წარადგენს, თუმცა როდის დაზუსტებული არ არის–„როგორც ყველა რეგიონში, სამცხე–ჯავახეთშიც გუბერნატორს ჩვენ წარვადგენთ. დრო დაზუსტებული არ არის, თუმცა ხვალ ან ზეგ აუცილებლად იქნება“.

ახალი გუბერნატორი ამ დრომდე არ ჩამოსულა რეგიონში. არც სამცხე–ჯავახეთის სამხარეო ადმინისტრაციაში იციან, როდის შეუდგება ბესიკ ამირანაშვილი მუშაობას.

საქართველოს პრემიერ–მინისტრმა მამუკა ბახტაძემ ბესიკ ამირანაშვილი, კიდევ ექვსი რეგიონის გუბერნატორთან ერთად დღეს, 20 აგვისტოს გამართულ ბრიფინგზე წარადგინა.

ბესიკ ამირანაშვილს, სამცხე–ჯავახეთის გუბერნატორად დანიშვნამდე იმერეთის, რაჭა–ლეჩხუმისა და ქვემო სვანეთის პოლიციის დეპარტამენტის დირექტორის პოზიცია ეკავა.

ამირანაშვილი 2008 წლიდან დღემდე შს სამინისტროში სხვადასხვა პოზიციაზე მუშაობდა, მათ შორის მინისტრის მოადგილის თანამდებობა ეკავა.

შეგახსენებთ, რომ 26 ივლისს პრემიერმა 5 რეგიონის - სამცხე - ჯავახეთის, შიდა ქართლის, მცხეთა - მთიანეთის, სამეგრელო- ზემო სვანეთის და ქვემო ქართლის გუბერნატორები თანამდებობებიდან გაათავისუფლა.რამდენიმე თვე გუბერნატორის ადგილი ვაკანტური იყო იმერეთის რეგიონშიც.

[ლუბა გიორგაძე, ახალციხე]