კვამლისგან შეწუხებული მოქალაქეები საცხობის მეპატრონეს მერიაში უჩივიან

„დღე თუ ღამე, როცა ცეცხლს ანთებენ შავი კვამლი გამოდის, ფანჯრებს ვერ ვაღებთ და ზაფხულშიც გამოკეტილები ვართ“, – ამბობენ რუსთაველის ქუჩაზე მცხოვრებლები. მათი თქმით, უკვე წელიწადზე მეტია, რაც პურის საცხობი ნამწვის გამწმენდი ფილტრის გარეშე მუშაობს, ამის გამო იკვამლება საცხობის გვერდით ახლად გაშენებული სკვერიც, სადაც საბავშვო ატრაქციონები დგას და ბავშვები თამაშობენ.

„იმ კვამლში, როგორ ვათამაშოთ, ბავშვებს სუნთქვა არ უნდათ?!“,– გვეუბნებიან ადგილობრივები.

უკმაყოფილების შესახებ იცის საცხობის მეპატრონემ. დავით ბალიაშვილი ადასტურებს, რომ მეზობლებმა არაერთხელ მიმართეს: „ერთხელ უკვე დავამონტაჟე ფილტრი, მაგრამ პრობლემა ვერ მოაგვარა. ახლა კიდევ შეკვეთილი მაქვს თბილისში, უახლოეს დღეებში როგორც კი დაასრულებენ გაკეთებას, ჩამოვიტან და დავამონტაჟებ".

ამ ქუჩის მცხოვრებლებს შორისაა მერიის სამოქალაქო საბჭოს წევრი მერაბ ბერიძეც, რომელმაც პრობლემის გადაჭრა მერს საბჭოს პირველივე სხდომაზე სთხოვა: „ძალიან ბევრჯერ მივმართეთ ფურნის მეპატრონეს, მაგრამ პრობლემა იგივე რჩება. ირგვლივ ყველაფერი იკვამლება, ზამთარში რომ მოხვიდეთ თოვლი შავია თუ თეთრი ვერ გაიგებთ, გადაფენილია ნამწვები“.

ახალციხის მერის ზაზა მელიქიძის თქმით, თუ კი მოქალაქეები წერილობით მიმართავენ, მერია მათ საცხობის მეპატრონესთან შუამდგომლობას გაუწევს.





[ლუბა გიორგაძე, ახალციხე]