ახალციხეში მინიფეხბურთის ჩემპიონატი უნივერსიტეტის გუნდმა მოიგო

ჩემპიონატი დღეს, 14 აგვისტოს 18:00 საათზე ცხრა აპრილის ქუჩაზე მდებარე მინი სტადიონზე ჩატარდა. ტურნირი 2 აგვისტოს დაიწყო და მასში 19 გუნდი მონაწილეობდა.

„ფეხბურთს ბავშვობიდან ვთამაშობ და ყოველთვის ვცდილობ, რომ მსგავს ჩემპინატებში მივიღო მონაწილეობა. დღეს დარწმუნებული ვიყავი, რომ გავიმარჯვებდით, რადგან ბიჭები ერთმანეთში შეთამაშებულები ვიყავით და ბევრი გავაკეთეთ იმისთვის, რომ მოგვეგო“, – ამბობს უნივერსიტეტის გუნდის წევრი გიორგი ბალახაძე.

დღეს ასევე, მესამე ადგილისათვის „წაქცეულებმა“ და სოფელ ურაველის გუნდებმა იბრძოლეს. მესამე ადგილზე ურაველი გავიდა.

პირველ, მეორე და მესამე ადგილზე გასული გუნდებს მედლები, თასები, და სერტიფიკატები გადაეცათ. ასევე, მათ ფულადი ჯილდო მიიღეს, პირველ ადგილზე გასულ გუნდს 300 ლარი, მეორე ადგილზე გასულს – 200, ხოლო მესამე ადგილზე გასულს – 100 ლარი ერგო.

ჩემპიონატში, ასევე, გამოვლინდა საუკეთესო ფეხბურთელი, საუკეთესო ბომბარდირი, ვეტერანი ფეხბურთელი, საუკეთესო მეკარე და ყველაზე ახალგაზრდა ფეხბურთელი. მათ საჩუქრები გადასცეს.

ახალციხელი სპორტსმენის როინ სუდაძის სახელობის ტურნირი 2015 წლიდან იმართება. ჩემპიონატი ახალციხის მუნიციპალიტეტის მერიის სპორტული პროგრამების განყოფილების ორგანიზებით ეწყობა.



[მარიამ ბარძიმაძე, ახალციხე]