როინ სუდაძის სახელობის ტურნირი მინი–ფეხბურთში დასრულდა

ტურნირი მინი–ფეხბურთში 26 აპრილს დაიწყო, დღეს, 28 აპრილს კი ახალციხის მიხეილ იაძის სახელობის სტადიონზე, ფინალური მატჩი გაიმართა. მასში ქალაქის სკოლების ხუთი გუნდი მონაწილეობდა.

ფინალურ შეხვედრაში ერთმანეთს პირველი და მეხუთე საჯარო სკოლების გუნდები დაუპირისპირდნენ. მცირე ასაკის კატეგორიაში, სადაც მეხუთე და მეექვსე კლასის მოსწავლეები თამაშობდნენ, მეხუთე საჯარო სკოლის მოსწავლეებმა გაიმარჯვეს. რაც შეეხება მოზარდების კატეგორიას, აქ პირველობა პირველი სკოლის გუნდს ერგო.

პირველ და მეორე ადგილზე გასულ გუნდებს თასები და სიმბოლური საჩუქრები გადაეცათ, ყველა მონაწილემ კი სამახსოვრო სიგელი მიიღო.
ჩემპიონატი მინი–ფეხბურთში ახალციხელი ფეხბურთელისა და მწვრთნელის, როინ სუდაძის ხსოვნას მიეძღვნა. ტურნირი მეექვსე წელია, ახალციხის სასპორტო სკოლის ორგანიზებით ტარდება.



[მარიამ ბარძიმაძე, ახალციხე]