რომელი გუნდი გახდა ახალციხეში კალათბურთის ტურნირის გამარჯვებული

ახალციხეში სასპორტო სკოლაში კალათბურთის მოყვარულებისთვის ტურნირი 9 ივლისიდან 12 ივლისამდე მიმდინარეობდა და მასში 6 გუნდი მონაწილეობდა.

„16 წლის ზევით ადგილობრივები თამაშობდნენ, იყვნენ სხვადასხვა ორგანიზაციის წარმომადგენლებიც“, – ამბობს ახალციხის მუნიციპალიტეტის მერიის სპორტული პროგრამების უფროსი სპეციალისტი გელა ძამუნაშვილი.

ფინალში ერთმანეთს „საგზაო სამმართველოსა“ და „ვეტერანების“ გუნდები შეხვდნენ. მატჩი საგზაოს უპირატესობით მიმდინარეობდა და მათი გამარჯვებითაც 79:30 დასრულდა. შესაბამისად, მეორე ადგილზე „ვეტერანები“ გავიდნენ, მესამე ადგილი კი „პატარა გიგანტებმა“ დაიკავეს.

„ნორმალური კონკურენტი გვყავდა, თუმცა გამარჯვებას ველოდით. კარგი იქნება თუ კალათბურთს ახალციხეში მეტ ყურადღებას მიაქცევენ“,– ამბობს „საგზაო სამმართველოს“ გუნდის წევრი გიორგი გურგენიძე.

სამივე ადგილზე გასულებს სიგელები, მედლები და თასები გადაეცათ, ასევე პირველ ადგილზე გასულ გუნდს – 300 ლარი, მეორეზე გასულს – 200, ხოლო მესამე ადგილზე გასულს 100 ლარი ჩაერიცხებათ.

ტურნირი ახალციხის მუნიციპალიტეტის მერიის ორგანიზებით ჩატარდა.



[მარიამ ბარძიმაძე, ახალციხე]