გრანტი ნიუ–იორკის სამხატვრო აკადემიაში – რატომ ითხოვს მხატვარი ფინანსურ დახმარებას

„ნიუ –იორკის აკადემიაში თუ წავალ, ეს ჩემი ახალი შემოქმედებითი ცხოვრების დასაწყისი იქნება. დაფინანსების თხოვნით ყველა სახელმწიფო უწყებას მივმართე, თუმცა უშედეგოდ. ერთი უწყებიდან მეორეში მაგზავნიან. სხვა გზა აღარ დამრჩა, დახმარებას საზოგადოებისგან ვითხოვ, არადა ეს სახელმწიფოს პასუხისმგებლობაა", – ამბობს თედო რეხვიაშვილი.

27 წლის მხატვარი წარმოშობით ადიგენიდანაა, გაზაფხულზე მშობლიურ მხარეს ეწვია და რამდენიმე სოფლის სკოლა და ადიგენის მერიის მიმდებარე ტერიტორია თავის მოსწავლეებთან ერთად მოხატა.

სოციალურ ქსელში თედოს მეგობრებმა თანხის შეგროვების მიზნით კამპანია სახელწოდებით "თედოსთვის" წამოიწყეს.

„ჩვენ თედოს მეგობრებს რაც შეგვიძლია მაქსიმალურად ვცდილობთ მის დახმარებას, ამისთვის მოვაწყეთ ჩვენი ნახატების გამოფენა–გაყიდვა. გვინდა იმდენი თანხა შევუგროვოთ, რომ შეძლოს ნიუ–იორკში სწავლა“, – ამბობს თედოს ერთ–ერთი მეგობარი და მხატვარი ლეილა გრიგოლია.

თედომ ნიუ–იორკის სამხატვრო აკადემიაში სასწავლებლის მიერ მაქსიმალური დაფინანსება, 15 000 დოლარის ოდენობის გრანტი მოიპოვა, თუმცა ეს საკმარისი არ აღმოჩნდა და დამატებით კიდევ 23 936 დოლარი სჭირდება. თანხის შესაგროვებლად კი მხატვარს რამდენიმე კვირა რჩება. ამ დროისთვის მოქალაქეების მიერ შეგროვილი 10 000–მდე ლარი აქვს.

მხატვარი ამჟამად ჰოლივუდისთვის მუშაობს ფილმზე, რომლის რეჟისორიც პირველად ჰოლივუდის ისტორიაში ქართველია. თედო მიიჩნევს, რომ ნიუ–იორკში სწავლის შემთხვევაში, ჰოლივუდთან მისი პროფესიული ურთიერთობა კიდევ უფრო გაღრმავდება:

„გიგა აგლაძის ფილმის მხატვარი ვარ, კადრირებაზე ვმუშაობ, ჩემი ჰოლივუდთან თანამშრომლობა შემდგომშიც გაგრძელდება და უფრო ნაყოფიერადაც თუ ნიუ–იორკში ვისწავლი. სასწავლებელს პირდაპირი კონტრაქტი აქვს ნიუ–იორკის გალერეებთან, სწავლის შემთხვევაში ჩემი ნამუშევრებიც გამოიფინება“, – ამბობს თედო.



მიმღების ბანკი: ს.ს. „თიბისი ბანკი“

ბანკის კოდი: TBCBGE22

მიმღების ანგარიში: GE98TB4919645062100001

მიმღების სახელი: თედორე რეხვიაშვილი

[sknews.ge]