ადიგენში კედლები მოხატეს [Photo]

ადიგენში მერიის მიმდებარე კედელი, სოფელ ჩორჩანსა და იმერთუბანში კი სკოლის შენობები ახალგაზრდა მხატვარმა თედო რეხვიაშვილმა მოსწავლეებთან ერთად მოხატა.

„ამ ნახატებით შევეცადეთ ადგილობრივების ცხოვრება გაგვეფერადებინა“, – ამბობს რეხვიაშვილი.

სოფელ ჩორჩანში მხატვრებმა სკოლის კედელზე ჩორჩნის ხედით და სახლებით სოფლის პეიზაჟი დახატეს.

„სკოლის მოხატვა მას შემდეგ გადავწყიტეთ, რაც გავიგეთ დახურვას უპირებდნენ. მერე აქ პროექტორით ანიმაციური ფილმებიც ვაჩვენეთ. გვინდოდა, რომ მოსწავლეების ცხოვრებაში ხალისი შეგვეტანა“, – ამბობს თედო რეხვიაშვილი.

ჩორჩანში ადგილობრივები ამბობენ, რომ მას შემდეგ რაც შენობა გააფერადეს, ბავშვები სკოლაში სიხარულით დადიან.

„ძალიან ლამაზია რაც ამ ახალგაზრდებმა დახატეს, ჩვენ სკოლას გაუქმებას უპირებდნენ, რადგან შარშან მხოლოდ ჩემი შვილი დადიოდა. ახლა ის სულ სხვა სიხარულით მიდის სკოლაში, ასე არიან სხვა ბავშვებიც. ყველას ძალიან მოგვწონს მოხატული კედლები“, – ამბობს ჩორჩანში მცხოვრები თამუნა გიორგაძე.

თედო ამბობს, რომ ნახატები უფროს თაობას ეუცხოვა, ახალგაზრდებს კი მოეწონათ: „მაგალითად, უფროსები გვეკითხებოდნენ, რატომ კოცნის გოგო გოგოს. ახალგაზრდები კი ცდილობდნენ მოგვხმარებოდნენ, ზოგს განათება მოჰქონდა, რომ მუშაობაში ხელი არ შეგვშლოდა. ვფიქრობ, მათ მეტი ყურადღება სჭირდებათ“.

თედო რეხვიაშვილი ადიგენიდანაა, ის 27 წლისაა და თბილისში ცხოვრობს. დედაქალაქში მას სამხატვრო სტუდია, („Tedo Art Studio“), აქვს. თუმცა, სექტემბერიდან ამერიკაში მიდის, ნიუ–იორკის სამხატვრო აკადემიის მაგისტრატურაში იწყებს სწალვას.

„ახლახან ნიუ–იორკის სამხატვრო აკადემიაში ჩავაბარე, გრანტი მივიღე, თუმცა თანხები მაინც მოსაძიებელი მაქვს. მხატვრისთვის ეს აკადემია იგივეა, რაც მეცნიერისთვის ჰარვარდი. სექტემბრიდან ნიუ–იორკში ვიცხოვრებ, მანამდე კიდევ ვაპირებ, რომ რამდენიმე მაღალმთიან სოფელში კედლები მოვხატო“.












[ავთანდილ ინასარიძე, ადიგენი]