წინუბანში აქციის მონაწილეებთან მერის მოადგილეები მივიდნენ

ახალციხის მერის პირველმა მოადგილემ გურამ მელიქიძემ წუნიბნელებს იმ გზის პროექტი წარუდგინა, რომლის მოასფალტებასაც ითხოვენ. მელიქიძის თქმით, სამკილომეტრიანი გზა 900 ათას ლარამდე ჯდება, თუმცა მისი გაკეთება მომავალ წელს დაიწყება.

„პროექტი გადაგზავნილია რეგიონულ ფონდში დასაფინანასებლად, ნაწილი ჩვენი ბიუჯეტით, ნაწილი კი მათი ფინანსური დახმარებით უნდა გაკეთდეს. მის განსახორციელებლად თანხა 2019 წელს გამოიყოფა“, – ამბობს მელიქიძე.

რაც შეეხება სოფელში წყლის პრობლემას, მერის მოადგილე აცხადებს, რომ მისი პროექტიც მზად აქვთ, თუმცა თანხა ჯერ არც მის განსახორციელბლადაა: „6 სოფლის წყლის პროექტია გაკეთებული და მათ შორის არის წინუბანიც. ახლა თანხის მოძიებას ვცდილობთ, ამიტომ პროექტი მუნიციპალური განვითარების ფონდში გვაქვს გაგზავნილი“.



შეგახსენებთ, რომ დღეს, 30 ივლისს დილიდან სოფელ წინუბანში ადგილობრივები საპროტესტო აქციას მართავენ. მათი მოთხოვნა სოფლამდე გზის დაგება და სუფთა სასმელი წყლის რეგულარულად მიწოდებაა.

[sknews.ge]