ანდეზიტსა და ციხისჯვარში გზის რეაბილიტაციის მოთხოვნით აქციას მართავენ

ანდეზიტისა და ციხისჯვრის 100–მდე მცხოვრებმა დღეს, პირველ ივნისს, დილის 08:00 საათიდან სოფელ ანდეზიტთან მისასვლელი გზა გადაკეტეს. ადგილობრივები ამბობენ, რომ სოფლებამდე მისასვლელი გზა წლებია ავარიულია, ბოლო ხუთი თვის განმავლობაში კი ვითარება განსაკუთრებით გართულდა, რადგან აქ წყლის სისტემის გაყვანა დაიწყეს, ამის გამო გზა გადათხარეს და ახლა ტრანსპორტით მოძრაობა თითქმის შეუძლებელია.

აქციის მონაწილეები ამბობენ, რომ ვიდრე გზის გასაკეთებლად ხელისუფლების წარმომადგენლები არ მივლენ და მძიმე ტექნიკას არ მიიყვანენ, არ დაიშლებიან.

„ასე ვიდგებით, ვიდრე ყურადღება არ მოგვექცევა. წლებია ნორმალური გზა არ გვაღირსეს. ზამთარში კიდევ წყლის სისტემა გაყავდათ, ამის გამო მთელი გზა დათხარეს და ასე დააგდეს, მანქანებით საერთოდ ვეღარ გადავდივართ, ჩვენც ხომ ხალხი ვართ?! ჩვენი პატრონი არავინაა!“ –განუცხადა „სამხრეთის კარიბჭეს“ აქციის ერთ–ერთმა მონაწილემ, სოფელ ანდეზიტის მკვიდრმა ვახტანგ ბიჩინაშვილმა.

ბორჯომის მერიაში განმარტავენ, რომ ციხისჯვარი–ანდეზიტის გზის რეაბილიტაციისათვის, მუნიციპალური განვითარების ფონდს ტენდერი უკვე გამოცახებული აქვს და სამუშაოები მალე დაიწყება: „ამიტომ მერიის წარმომადგენლები აქციის მონაწილეებთან შეხვდრას არ გეგმავენ“.
მუნიციპალური განვითარების ფონდში კი აცხადებენ, რომ ორ დღეში წყალმომარაგების კომპანია დაასრულებს წყლის სისტემის დაქსელვის სამუშაოებს და კომპანია „ჰედექსჯორჯიას“ ტექნიკა დაიწყებს მუშაობას.

მუნიციპალური განვითარების ფონდში აცხადებენ, რომ ციხისჯვარი–ანდეზიტის რვა კილომეტრიანი გზის რეაბილიტაციისათვის ორმილიონ ლარამდე იხარჯება.

[ლუბა გიორგაძე, ბორჯომი]