ახალქალაქში სტუდენტების ექსპედიცია გუბერნატორის გარეშე დაიწყო

კახა სამხარაძის ინიციატივით მოწყობილი ექსპედიცია ახალქალაქის მუნიციპალიტეტში დღეს, 26 ივლისს დილიდან დაიწყო.

მონაწილეები ახალქალაქის ციხეზე, ადგილობრივი თვითმმართველობის წარმომადგენლებს შეხვდნენ, რის შემდეგც მიმდებარე ტერიტორიაზე დასუფთავების აქცია გაიმართა.

დღესვე ექსპედიციის წევრები მოინახულებენ კუმურდოს მონასტერს, ახალქალაქში არსებულ სომხურ სამოციქულო და მართლმადიდებლურ ტაძრებს, ბარალეთის ეკლესიას, იხტილის ეკლესიას, სამსარის სამონასტრო კომპლექსს და დღის ბოლოს არაგვას ეკელესიის მიმდებარედ დაბანაკდებიან.

როგორც სამცხე–ჯავახეთის გუბერნატორის მოადგილე გიორგი მიქელაძე განმარტავს, კახა სამხარაძე თბილისშია და ექსპედიციას საღამოს შეუერთდება.

"ბოლოს ტელეფონზე რომ ვესაუბრე, მითხრა, რომ საღამოს შემოგვიერთდებოდა, სხვა არაფერი ვიცი", – ამბობს გიორგი მიქელაძემ.

შეგახსენებთ, რომ საქართველოს პრემიერ–მინისტრმა მამუკა ბახტაძემ დღეს, 26 ივლისს ხუთ გუბერნატორთან ერთად კახა სამხარაძე თანამდებობიდან გაათავისუფლა.

სამცხე–ჯავახეთის მუნიციპალიტეტებში ექსპედიციის მოწყობა კახა სამხარაძის ინიციატივა იყო, რომელიც მიზნად სტუდენტების მხრიდან, საკუთარი თვალით დანახული პრობლემების შესახებ წინადადებების მომზადებას ისახავდა.

კახა სამხარაძემ სტუდენტებთან ერთად, უკვე მოინახულა ახალციხის, ასპინძის, ბორჯომისა და ადიგენის მუნიციპალიტეტები. გუბერნატორისა და სტუდენტების ექსპედიცია დაგეგმილია ნინოწმინდაშიც, რომელიც სავარაუდოდ მომავალ კვირაში უნდა მოეწყოს.

[ლუბა გიორგაძე, ახალციხე]