გუბერნატორი სტუდენტებთან ერთად ორდღიან ექსპედიციას ასპინძაში მოაწყობს

ასპინძაში 20 სტუდენტი სამცხე–ჯავახეთის რწმუნებულთან კახა სამხარაძესთან და ადგილობრივი თვითმმართველობის წარმომადგენლებთან ერთად 20 ივნისს გაემგზავრება.

ექსპედიციის მონაწილეები პირველ დღეს ასპინძის ციხეს, აგარის მონასტერს, საროში დედათა მონასტერს, ასევე, ხერთვისის ციხეს და სოფელ ოთის ისტორიულ ძეგლებს დაათვალიერებენ. მეორე დღეს, 21 ივნისს კი ვარძიას და ვანის ქვაბებს ესტუმრებიან.

ექსპედიციის ორგანიზატორების თქმით, მონაწილეები ასპინძაში ადგილობრივებსაც შეხვდებიან და მათი პრობლემების შესახებ მოისმენენ, ასევე, მოაწყობენ დასუფთავების აქციას. ექსპდიციის დასრულების შემდეგ კი ასპინძაში სტუდენტები მათი თვალით დანახული პრობლემების გადაჭრის შესახებ საპროექტო წინადადებებს მოამზადებენ.

შეგახსენებთ, რომ სამხარეო ადმინისტრაციის ინიციატივით, სამცხე–ჯავახეთის გუბერნატორი, თვითმმართველობების წარმომადგენლებთან და 60–მდე სტუდენტთან ერთად, რეგიონის კულტურულ ძეგლებს, ასევე, მუნიციპალიტეტებში მიმდინარე ინფრასტრუქტურულ პროექტებს დაათვალიერებენ და რეგიონში არსებული პრობლემების შესახებ იმსჯელებენ. პირველი ასეთი ექსპედიცია უკვე ჩატარდა ახალციხის მუნიციპალიტეტში.

[თინათინ ზაზაძე, ახალციხე]