სამცხე–ჯავახეთის გუბერნატორი და სტუდენტები ასპინძას სტუმრობენ

კახა სამხარაძისა და სტუდენტების ექსპედიცია დღეს, 20 ივნისს ასპინძის ცენტრალური პარკიდან დაიწყო. მონაწილეებმა, ადგილობრივი თვითმმართველობის წარმომადგენლებთან გაცნობითი ხასიათის შეხვედრა გამართეს, რის შემდეგაც, ასპინძის ციხის მოსანახულებლად წავიდნენ.

ახალგაზრდები და თვითმმართველობის წამომადგენლები, ექსპედიციის პირველ დღეს, აგარის მონასტერს, საროს დედათა მონასტერს, ხერთვისის ციხესა და სოფელ ოთის ისტორიულ ძეგლებს დაათვალიერებენ, ხოლო ხვალ, 21 ივნისს, ვარძიასა და ვანის ქვაბებს ესტუმრებიან.

ტურისტული მარშრუტის პარალელურად, იგეგმება ასპინძის მუნიციპალიტეტში მიმდინარე ინფრასტრუქტურული პროექტების მონახულება და ადგილობრივ მოსახლეობასთან შეხვედრები. გარდა ამისა, მოეწყობა დასუფთავების აქციაც.

ორ დღიანი ექსპედიციის დასრულების შემდეგ, სტუდენტები საკუთარი თვალით დანახული პრობლემების შესახებ საპროექტო წინადადებებს მოამზადებენ.

შეგახსენებთ, რომ სამხარეო ადმინისტრაციის ინიციატივით, სამცხე–ჯავახეთის გუბერნატორი, თვითმმართველობების წარმომადგენლებთან და 60–მდე სტუდენტთან ერთად, რეგიონის კულტურულ ძეგლებს, ასევე, მუნიციპალიტეტებში მიმდინარე ინფრასტრუქტურულ პროექტებს დაათვალიერებენ და რეგიონში არსებული პრობლემების შესახებ იმსჯელებენ. პირველი ასეთი ექსპედიცია უკვე ჩატარდა ახალციხის მუნიციპალიტეტში.

[ლუბა გიორგაძე, ასპინძა]