სოზარ სუბარი რეგიონული მართვის სამსახურს უხელმძღვანელებს

მამუკა ბახტაძის თქმით, მთავრობის ადმინისტრაციაში რეგიონული მართვის სამსახურის მთავრობის ადმინისტრაციის დაქვემდებარებაში გადატანა, უზრუნველყოფს მთავრობის მაქსიმალურ ჩართულობასა და კოორდინაციას რეგიონალურ პოლიტიკის წარმართვის მიმართულებით.

"ინფრასტრუქტურის სამინისტროს გამოეყოფა რეგიონალური მართვის კომპონენტი და გადმოვა საქართველოს მთავრობის ადმინისტრაციაში. ამ ცვლილებების აუცილებლობა დაგვანახა გამოცდილებამ",- განაცხადა პრემიერ–მინისტრმა.

მისი თქმით, დღემდე არსებული რეგიონული მართვის სისტემა ვერ პასუხობდა იმ გამოწვევებს, რომლებიც რეგიონულ მმართველობაშია.

"თქვენ იცით, რომ ჩვენი ინიციატივების უდიდესი ნაწილი მიმართულია რეგიონებში ახალი პროექტების განხორციელებისკენ. იმისათვის,რომ ჩვენ რეგიონებში შევძლოთ ხარისხობრივად ცხოვრების დონის გაუმჯობესება. აქედან გამომდინარე, ჩვენ მივიღეთ გადაწყვეტილება, რომ აღნიშნული სამსახური უშუალოდ იყოს პრემიერ–მინისტრის დაქვემდებარების ქვეშ, რათა ჩვენ გვქონდეს უკუკავშირი და პირდაპირი კავშირი საზოგადოებასთან უფრო ეფექტურად. დარწმუნებული ვარ, რომ სოზარი ამ მიმართულებაში ძალიან დამეხმარება", – განაცხადა მამუკა ბახტაძემ.

სოზარ სუბარს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის თანამდებობა ეკავა. ეს სამინისტრო მთავრობის სტრუქტურის შეცვლის შედეგად გაუქმდა.

შეგახსენებთ, რომ მამუკა ბახტაძემ დღეს, 26 ივლისს თანამდებობიდან ხუთი რეგიონის გუბერნატორი გაათავისუფლა, მათ შორის სამცხე–ჯავახეთის მხარის რწმუნებული კახა სამხარაძე. როგორც მთავრობის მეთაურმა განაცხადა, ცვლილება აუცილებელი იყო: "რეგიონის მართვასთან და ცენტრალურ ხელისუფლებასთან კოორდინაციის გაუმჯობესების თვალსაზრისით".

[sknews.ge]