ახალციხელები ''ქართული ოცნების'' ხვალინდელ აქციაზე

”ქართული ოცნება” 27 მაისის აქციისთვის ბოლო დეტალებს აზუსტებს.

მსველელობა ხვალ პირველ საათზე დედაქალაქში სამი სხვადასხვა ადგილიდან დაიწყება: ვაკის პარკიდან, დიდუბის პანთეონიდან და ავლაბრის მეტროდან.

როგორც ”სამხრეთის კარიბჭეს” ”ქართული ოცნების” ერთ-ერთმა ლიდერმა და აქციის ორგანიზატორმა ზვიად ძიძიგურმა განუცხადა, ხალხის კონცენტრირება თავისუფლების მოედანზე სამ საათზე მოხდება. აქ შედგება დასკვნითი ღონისძიებაც.

- ”დილის 5 საათიდან ვიწყებთ ტექნიკური საშუალებების დამონტაჟებას. უნდა მოვიცვათ ძალიან დიდი ფართობი, პარლამენტის ტერიტორიის ჩათვლით. მინდა გითხრათ, რომ თბილისში არათუ დახურული დარბაზი, ღია ცის ქვეშაც კი არა იმხელა მოედანი, სადაც ივანიშვილის ყველა მხარდამჭერი დაეტევა”, - აცხადებს ძიძიგური.

ხვალინდელი აქციისთვის რეგიონებიდან ხალხის მობილიზება არ ხდება. ვისაც აქციაზე წასვლა სურს, რეგიონიდან თბილისში ის თავად წავა. შესაბამისად, კოალიცია ”ქართული ოცნების” ახალციხის ოფისში აქციაზე წასასვლელად მხარდამჭერთა ორგანიზება არ ხდება. თუმცა, როგორც ახალციხის ოფისში, პირად საუბარში ამბობენ, მათ თბილისში წასვლის ბევრი მსურველი აკითხავთ.

”სამხრეთის კარიბჭის” მიერ ქუჩაში გამოკითხულთა უმრავლესობა, დედაქალაქში დაგეგმილი ღონისძიებისადმი ინდიფერენტულადაა განწყობილი.

”არ ვაპირებ აქციაზე დასწრებას, არც ამათთან და არც იმათთან, არ აქვს აზრი და იმიტომ. ხალხის მონაწილეობა პოლიტიკაში მაინც ვერაფერს შეცვლის. ერთი კია, სოფლელი კაცი ვარ, ქალაქში უამრავი სასტუმროს აშენებას, მირჩევნია სოფლის მეურნეობას მიხედონ, სოფელს მიაქციონ ყურადღება”, - ამბობს ადიგენის მუნიციპალიტეტის სოფელ ბენარაში მცხოვრები ჯონი გაბრიჩიძე.

ხვალ თბილისში დაგეგმილი აქციის შესახებ არაფერი იცის შუახნის ტაქსის მძღოლმა: ”ჯერ დრო გვაქვს, ვიფიქრებთ ვინ უნდა ავირჩიოთ”.

ავთანდილ წიქვაძემ თბილისში დაგეგმილი ღონსიძიების შესახებ ტელევიზიით მოისმინა: ”არამგონია აქედან ვინმე წავიდეს. ან რა მნიშვნელობა აქვს ამ აქციის გამართვას?! რისთვის უნდა გამართონ?! სახელმწიფო შემდგარია, ჩვეულებრივ მუშაობს ხალხი. მთავრობა ხალხის კეთილდღეობაზე ზრუნავს”.

მიუხედავად იმისა, რომ რეგიონებიდან მხარდამჭერთა ორგანიზება არ ხდება, ძიძიგური სხვადასხვა რაიონიდან მაინც ბევრ ადამიანს ელოდება.

- ”ორგანიზებულად მათი ჩამოყვანა არ გვაქვს დაგეგმილი, რადგან ჩვენ არ ვაპირებთ საარჩევნო კამპანიის დაწყების შემდეგ თბილისში გვქონდეს ძირითადი ყურადღება და რესურსი გადმოტანილი. 27 მაისის შემდეგ გავალთ რეგიონებში და მათ შორის სამცხე-ჯავახეთშიც, ამგვარი შეხვედრა ყველა რეგიონში მოეწყობა”, - განუცხადა ”სამხრეთის კარიბჭეს” აქციის ორგანიზატორმა.

[თამუნა უჩიძე, ახალციხე]