19 აპრილს დაგეგმილი აქცია და მოსახლეობის განწყობა მესხეთში

ქუჩაში გამოკითხულთა უმრავლესობა ამბობს, რომ 19 აპირლს აქციაზე წასვლას არ აპირებს, ნაწილი კი ’სამხრეთის კარიბჭესთან’ ამ თემაზე საუბარს თავს არიდებს.

’არ მივდივარ აქციაზე, რადგან წასვლას აზრი არ აქვს! ხალხისთვის მაინც არავინაა! რომელი მთავრობაც არ უნდა მოვიდეს გლეხებს მაინც არაფერი ეშველებათ’ - ამბობს ახალციხეში მცხოვრები მალხაზ ჩაჩანიძე.

მის მოსაზრებას იზიარებენ ადიგენის მუნიციპალიტეტის სოფელ გომაროში მცხოვრები ემზარ მიქელაძე და ია ბერიძე.

’თუ ჩვენ თავად არ გავაკეთეთ რაიმე, აქციებით ვერავინ ვერაფერს გვიშველის’, - გვითხრა მიქელაძემ.

გამოკითხულთა უმრავლესობა მიიჩნევს, რომ თუ ’ნაციონალებს’ ქვეყნისთვის რაიმე კარგის გაკეთება უნდოდათ, საამისოდ მათ 9 წელი ჰქონდათ და აქამდე უნდა გაეკეთებინათ.

’ახლა აქციის ჩატარება ზედმეტად მიმაჩნია და არც წასვლას ვაპირებ. რატომ არ აცდიან ახალ მთავრობას რამეს გაკეთებას?! ჯერ ეხლა მოვიდნენ და დრო სჭირდებათ’, -ამბობს ადიგენის რაიონ სოფელ მლაშეს მკვიდრი ლილი ლობჯანიძე.

აქციაზე წასვლის სურვილი არც ახალციხელ ნათელა ხითარიშვილს აქვს. მას მიაჩნია, რომ ასეთი აქციებით ქვეყანაში არაფერი შეიცვლება, ’ნაციონალურ’ მოძრაობას კი უბრალოდ ხალხის სიმრავლე მხარდასაჭერად სჭირდება.

’ხალხს გზის ფული არ აქვს და სად წავა?! ახალი მთავრობა მოვიდა და მას დააცადონ საქმის კეთბა! ამდენი წელია ხომ ატარეს აქციები, არ ეყოთ?! ცხრა წელი ხალხი მშიერი იყო და ახლა მათ მხარდასაჭერად წავიდეთ?! არც არავინ მივა მათ აქიაზე დარწმუნებული ვარ’ - ვერ მალავს აღშფოთებას ასპინძის მკვიდრი ვასილ ნარიმანიძე.

გამოკითხულთა ნაწილი ამბობს, რომ ყოფილმა მთავრობამ მათ იმედები გაუცრუა, ამიტომ ახლა მათთვის ტაშისკვრას არ აპირებენ. ნაწილს კი აქციაზე წასვლის სურვილი იმიტომ აქვს, რომ საკუთარი აზრი დააფიქსიროს.

’მინდა მთავრობამ და ოპოზიციამ ერთმანეთში ბრძოლას თავი დაანებოს და ხალხს მიხედონ. იმედია ამის სათქმელად წასვლის საშუალება მოგვეცემა და ხელს არ შეგვიშლიან, - ამბობს ახალციხეში მცხოვრები ლილი კაპანაძე.

შეგახსენებთ, რომ 19 აპრილს „ნაციონალური მოძრაობა“ ძველი პარლამენტის შენობის წინ საპროტესტო აქციის გამართვას გეგმავს. საქართველოს შს მინისტრმა ირაკლი ღარიბაშვილმა, 19 მარტს, ჟურნალისტებთან შეხვედრისას განაცხადა, რომ აქციაზე უსაფრთხოების ზომები დაცული იქნება.

[ნუკა სტეფნაძე, ახალციხე]