‘ოცნების’ ორგანიზებულ აქციაზე ბორჯომიდან 2 000 კაცი წავიდა

„ოცნების“ მიერ ორგანიზებულ შეხვედრაზე წასასვლელად ბორჯომის ცენტრში დილიდან შეიკრიბნენ. უმეტესობამ ჟურნალისტებთან საუბარი არ ისურვა. ხშირ შემთხვევაში მათი პასუხები ასეთი იყო: „შენი საქმე არაა მე სად წავალ“, სადაც მინდა იქ წავალ“, „მე არა მივდივარ ახლობელს ვაცილებ“.

„თბილისში მივდივართ ევროსაბჭოს თავმჯდომარე ქვეყანა ვართ და უნდა ვიზეიმოთ. ძალიან გვიხარია და სიამოვნებით მივდივარ“, –ამბობს ბორჯომში მცხოვრები მზიური გელაშვილი.

„მე თუ არ მინდა ვერც სამსახური, ვერც ოცნება და ვერც ნაციონალები ვერ დამავალებენ ვერფერს. საქართველოს ექვსი თვით მიანიჭეს საბჭოს თავმჯდომარეობა და ამის აღსანიშნავად მივდივართ“– ამბობს ანზორ ხაჩიძე.

საჯარო მოხელეებთან ერთად, თბილისში დაგეგმილ შეხვედრაზე წავიდნენ ბორჯომის უფასო სასადილოს ბენეფიციარებიც.

„მე მივდივარ ჩემი სურვილით, რომ ქართული ოცნება ისევ დარჩეს ხელისუფლებაში. ჩვენ უფასოდ გავჭმევენ საჭმელს და იქ გვითხრეს, რომ წავიდეთ თბილისში და მივდივართ. წასასველად გზის ფულს არ ვიხდით, მათ მივყავართ “ – ამბობს ბორჯომის სათნოების სახლის ბენეფიციარი, ზოია კუზოვაია.

ბორჯომის მუნიციპალიტრეტის მერის, ლევან ლიპარტიას თქმით, მოსახლეობა თბილისში თავისი სურვილით მიდის.

პოლიტიკური გაერთიანება „ქართული ოცნება - დემოკრატიული საქართველო“ დღეს თავისუფლების მოედანზე ღონისძიებას „საქართველოს გზა ევროპისკენ“ გამართავს. პარტიაში აცხადებენ, რომ ღონისძიების ინიციატორი მათი ახალგაზრდული ორგანიზაციაა და ის საქართველოს ევროპის საბჭოს თავმჯდომარეობას ეძღვნება.



[ნუკა სტეფნაძე, ბორჯომი]