ახალციხეში, ვარძიის ქუჩაზე ადგილობრივები წყლის პრობლემაზე ჩივიან

ახალციხეში, ვარძიის ქუჩაზე წყალი ისე წყდება, რომ აქ მცხოვრებლები ჭურჭლის გავსებას ვერ ასწრებენ.

„ერთი ვედროც ვერ ავავსე და ახლაც არ მოდის, როგორ მოვიქცეთ?! მთელი დღე წყალს ველოდებით ბავშვები გვყავს, ასე როგორ შეიძლება. ისეთი დაბალი წნევა აქვს წყლის გამათბობლებსაც კი ვერ ვრთავთ“, – ამბობს ვარძიის ქუჩაზე მცხოვრები მზია ჩიტაშვილი.

ადგილობრივების განმარტებით პრობლემის მოგვარების მიზნით „წყალმომარაგების კომპანიას“ არაერთხელ მიმართეს, დაპირების მიუხედავად მათ დასახმარებლად არავინ მისულა.

„ორი კვირის წინ მივედი კომპანიაში,მითხრეს მოვალთ და დავაბერინებთ გაჭედილი ხომ არ არისო, მაგრამ არავინ მოსულა. უწყლოდ ვართ, ზაფხულია ყველას წყალი გვჭირდება, დაბანასაც ვერ ვახერხებთ, წვეთობით მოდის“, – ამბობს ვარძიის ქუჩაზე მცხოვრები ლამზირა ლომიძე.
ადგილობრივების განმარტებით, წყალი ყოველ დილა–საღამოს დაახლოებით ნახევარი საათით მოდის, მსგავსი პრობლემა აწუხებს ხაშურის ქუჩის მცხოვრებლებსაც: „ერთი ვედროსაც ვერ ვავსებთ, იქნებ დაგვეხმაროთ ეს პრობლემა მოგვიგვარდეს“, – აცხადებენ ადგილობრივები.

„წყალმომარაგების კომპანიის“ ტექნიკური აქტივების მართვის დეპარტამენტის უფროსის მიხეილ თათარაძის განმარტებით აღნიშნულ ქუჩებზე ამ ეტაპზე პრობლემა არ არსებობს და წყლის წნევაც დამაკმაყოფილებელია.

„ადგილზე იყო მისული ტექნიკური სამსახური. გადაამოწმეს და წყალმომარაგება ჩვეულ რეჟიმშია, წყლის წნევაც დამაკმაყოფილებელია. ამ დროისთვის პრობლემა არ არის. მანამდე როგორ იყო ვერ გეტყვით, რადგან აქამდე არ გადამიმოწმებია“, – განაცხადა სატელეფონო საუბარში მიხეილ თათარაძემ.

თუ პრობლემა არ მოგვარდება „წყალმომარაგების კომპანიის“ ხელმძღვანელობასთან ვარძიის ქუჩის მცხოვრებლები ერთად მისვლას აპირებენ: „24–საათიან წყალმომარაგებას გვპირდებოდნენ და განრიგითაც არ გვაქვს ნორმალურად!“

ექნებათ თუ არა ვარძიის ქუჩაზე 24–საათიანი წყალმომარაგება, კომპანიის წარმომადგენლებს ამ ეტაპზე პასუხის გაცემა უჭირთ.

„ვსწავლობთ 24– სათიანი წყალმომარაგების შესაძლებლობას არა მარტო ამ ქუჩაზე, არამედ , ყველა იმ ქუჩაზე, სადაც წყალი განრიგით მიეწოდებათ. ამ ტექნიკურ შესაძლებლობაზე მიმდინარეობს კვლევა, ჯერ საძიებო სამუშაოები არ დასრულებულა რაც კონკრეტული პასუხის გაცემის საშუალებას მომცემს“, – განაცხადა მიხეილ თათარაძემ



[თინათინ ზაზაძე, ახალციხე]