აბიტურიენტები გამოცდას ინგლისურ ენაში აბარებენ

ინგლისური ენის გამოცდისთვის რეგისტრაცია 08:00 საათზე, გამოცდა კი 09:00 საათზე დაიწყო. ახალციხის საგამოცდო ცენტრში განმარტავენ, რომ ინგლისური ენის გამოცდის პირველ სესიაზე 271 აბიტურიენტი იყო დარეგისტრირებული, აქედან საგამოცდო ცენტრში ოთხი არ გამოცხადდა. დღესვე, ინგლისური ენის მეორე სესიაც გაიმართება, რეგისტრაცია 14:00 საათზე, გამოცდა კი 15:00 საათზე დაიწყება.

შეგახსენებთ, რომ გამოცდები ახალციხის მეხუთე საჯარო სკოლის შენობაში მიმდინარეობს. საქართველოს განათლების სამინისტროს ინფორმაციით, საქართველოს მასშტაბით 11 დიდ ქალაქში 19 საგამოცდო ცენტრია გახსნილი.
ახალციხეში, ისევე, როგორც ყველა საგამოცდო ცენტრთან, მობილიზებულია სახანძრო, სამაშველო და სასწრაფო დახმარების სამსახურები.

ახალციხის საგამოცდო ცენტრთან, ხალხმრავლობის გამო, რუსთაველის ქუჩიდან ახალციხის ცენტრალური პარკისკენ ( და პირიქით) სამანქანო გზა გადაკეტილია. მოძრაობა შეფერხებული გამოცდების დასრულებამდე დარჩება.

საქართველოს განათლებისა და მეცნიერების სამინისტროს ინფორმაციით, წელს ერთიან ეროვნულ გამოცდებზე 40 000 - მდე აბიტურიენტია დარეგისტრირებული.

[თამარ თოთაძე, ახალციხე]