უნივერსიტეტში საგამოცდო ტესტების შტრიხ–კოდების ამოცნობა ვერ ხერხდება

განათლების, ჰუმანიტარულ და სოციალურ მეცნიერებათა ფაკულტეტის ისტორიის მესამე კურსის სტუდენტმა როზმარ გულაროვმა ორ გამოცდაში ტესტი 15 ივნისს დაწერა. რამდენიმე დღის შემდეგ მას უნივერსიტეტიდან დაუკავშირდნენ და უთხრეს, რომ მისი ნაწერის ამოცნობას ვერ ახერხებენ და ამისთვის უნივერსიტეტში უნდა გამოცხადდეს: „შტრიხები აირიაო. დარწმუნებული არ ვარ ამოვიცნობ თუ არა. ხან გაკრული ხელით ვწერ და ხან კარგად“.

დაწერილი ტესტის ამოსაცნობად უნივერსიტეტში ჯერ არც ნანა აჩელაშვილი მისულა: „ხვალ უნდა მივიდე დილით, როგორც გვითხრეს ბევრჯერ მოხვდა ხელი და კოდი გაიცრიცა. სხვა არაფერი ვიცი“.

უნივერსიტეტის გამოცდების ცენტრის წარმომადგენელის დარეჯან ვედიაკოვის განმარტებით პრობლემა მხოლოდ ერთ ფაკულტეტს შეექმნა: „შტრიხ–კოდებზე, რომელიც ჩვენ დავაკარით ხელი აქვს გადასმული, ალბათ ოფლიანიც. შესაძლოა კოდის დაწებების დროს თანამშრომელმაც გადაუსვა ხელი, ამიტომ აპარატს ამოკითხვა უჭირს“.

კითხვაზე გააფრთხილეს თუ არა წინასწარ სტუდენტები რომ ხელი არ გადაესვათ შტრიხ–კოდზე, ვედიაკოვი გვპასუხობს, რომ არა: „არც მე ვიცოდი თუ არ შეიძლებოდა. აქამდე მსგავსი პორობლემა არ გვქონია. ოთხი წელია ეს ტესტები გვაქვს“.

განათლების, ჰუმანიტარულ და სოციალურ მეცნიერებათა ფაკულტეტის სპეციალისტის ლაურა თარხნიშვილის განმარტებით უნივერსიტეტში საკუთარი ნამუშევრების ამოსაცნობად 44 სტუდენტი დაიბარეს.

„დიდი ჯგუფია, ტესტებს ფაქიზად უნდა მოპყრობს, ჯერ სტუდენტი ეხება, მერე ფაილში ჩადების დროს ზიანდება, შემდეგ ასწორებენ, ეს ყველაფერი მოქმედებს და შტრიხ–კოდი გაუფერულდა, ამის გამო ვერ წაიკითხა აპარატმა. ორი გამოცდის შედეგებზეა საუბარი. ეს არის ბიზანტიის ისტორია და ისლამური სამყაროს ისტორია“, – ამბობს ლაურა თარხნიშვილი.

შეგახსენებთ, რომ სამცხე–ჯავახეთის უნივერსიტეტში მიმდინარე წლის ინავარში ელექტრონულად ჩაბარებული გამოცდების შედეგები წაიშალა. მაშინ ის სერვერი დაიწვა, რომელზეც სტუდენტების შედეგები ინახებოდა.

[თინათინ ზაზაძე, ახალციხე]